CARACAS, Venezuela- Fiscalia di Venezuela diahuebs a bisa den un comunicado cu el a cita pa declara e ex- hefe di Guardia Nacional Antonio Benavides, den un caso cu ta wordo investiga pa “violacionnan grave y sistematico” di e derechonan humano durante e actual ola di protesta anti- gubernamental.
Den e ultimo tres lunanan, casi tur dia, miyones di persona a subi cayanan di Venezuela pa protesta contra di loke nan ta considera un “dictadura” den jornadanan cu, den su mayoria, ta termina den chokenan violento cu forsanan publico.
E titular di Ministerio Publico, fiscal Luisa Ortega cu a aleha su mes for di Gobierno di Nicolas Maduro desde cue protestanan ta cuminsa, a condena e represion “excesivo” di parti di e autoridadnan, particularmente di Guardia Nacional y polis militar.
Mayor General Benavides, kende a wordo releva for di su cargo siman pasa pa wordo nombra hefe di gobierno di Distrito Capital, lo mester acudi na Fiscalia dia 6 di Juli proximo pa presenta su defensa.
Rond di 80 persona a muri durante e 12 simannan di protesta, algun di nan door di tironan di parti di autoridadnan uniforma. Diahuebs, miles di siguidonan di oposicion un biaha mas a sali bay marcha y e manifestacion a wordo reprimi cu gasnan lacrimogeno y tironan.
Fuente: www.ltareuters.com