LIMA, Peru (AP) – E ex director di e polis nacional di Peru a wordo deteni diamars mientras cu su cas a wordo registra pa su presunto vinculo cu un banda criminal cu tabata trafica mucha.
Ministerio Publico a acusa e general Raul Becerra Velarde di ta pertenece, hunto cu 14 otro persona, na e banda identifica como “Los Desalmados del Trafico Humano” cu tabata comercialisa mucha y baby di Arequipa. Nan tabata secuestra muhenan na estado, e.o. delito, segun e fiscal na cargo di e operativo, general Walter Ortiz.
El a precisa cu e investigacion a cuminsa na mei di e aña aki y a identifica como e cabesante di e grupo na Cintia Tello, pareha di Becerra Velarde.
El a agrega cu durante e registro na Arequipa, 900 km pafo di Lima, agentanan a rescata un menor di cinco luna y a tuma documentonan, celular, placa, dos auto y otro propiedadnan den beslag.
Según Ministerio Publico, e grupo tabata busca muhenan na estado na kenda nan tabata duna placa pa nan no interumpi nan embaraso, cu e proposito di keda cu e babynan.
Ministerio di Husticia Peruano ta preparando un proyecto di ley pa regula e tecnicanan di reproduccion humano asisti, entre cual e “vientrenan di alquiler”. Esakinan ta personanan cu, a cambio di placa, ta carga un baby pa un pareha cu no pro haya yiu.