Cierto cosnan ta sali den prensa cu no ta cuadra cu berdad. Ta trata aki di cierto informacion tocante un cahera ganando 17 mil florin pa luna. Sr. Diego de Cuba, di sindicato STA.
Segun Sr. De Cuba, ex- director di ELMAR, Sr. Raul Henriquez, ta sacando informacion priva di e compania afo, y esaki ta algo cu no ta permisibel, ya cu Sr. Henriquez mester tene cuenta cu e tambe ta un trahado.
Pa esaki nan a atende cu nan a reuni cu Sr. Filomeno “Shon No” Maduro y tambe Sr. Koolman, como tambe abogado Ruiz, cu a atende e reunion urgente aki. Tur e trahadonan tabata cla pa pone trabao plat y kier a bay manifesta dilanti oficina di Chris Lejeuz, pa cu declaracionnan eroneo cu el a duna den prensa.
Sr. de Cuba ta sigui bisa cu un persona manera mr. Lejuez, pa kende e tin masha respet. Un abogado tin tur derecho pa traha pa su placa, pero e ta uzando dos trahado cu ta den schorsing, cu den bista di Alvast y STA, ta inhustamente pa bo tapa locual cu abo tin ta haci malo pa añanan largo caba. Esaki ta locual cu STA ta condena severamente. Y e cosnan aki no mag di ripiti.
Tambe STA a entrega na gerencia un protocol cu a ser firma prome cu STA a drenta y a bisa gerencia cu e protocol ey no tin niun validez mas, mirando cu e hecho cu mas di 95% di Elmar a afilia na STA; y a yega e momento pa papia ariba e contrato colectivo. Esaki tambe ta algo cu bay exigi bastante tempo y ta spera cu logra esaki tambe. Ta bay tin varios reunion cu lo mester bay tuma luga, posiblemente dia 10 di october.
Por mira si, un cambio cu toch ta wak e speransa den e maneho, y cu ta haci e trahadonan mas trankilo. Sr. Henriquez, segun Sr. de Cuba, cu e mes a coba su graf. Con e por bay traha bek si e ta sembrando odio, bou di empleadonan, cu e lo tin di bay enfrentanan, traha cu nan. Pero con esaki por ta posibel? No por, segun Sr. de Cuba.
Aworaki Sr. Henriquez kier trece cosnan den publicidad, pa scapa su peyeho. E “compincheria” y e mal maneho di e cabayero aki, ta un lista largo. Tin hendenan den Utilities cu tambe a coopera cu nan. Y esaki ta fout. Tin algun nomber di e companianan si, pero tin mas hopi hende cu a probecha di e situacion aki.
Por a mira un malgastamento di placa cu tabata tin. Si papia di e Green Conference, Wubo Orkels, un par di miyon tira afo. Cu e placa ey por a construi e scol na noord. Y apart di esaki, tin un proyecto unda cu ex prome minister a pone e hendenan aki di Elmar presta placa (17 miyon florin) pa cumpra Led Lights. Por a haya algo mas abao, si a pidi mas oferta. Aki nan a distribui placa innecesario.
Mirando cu Sr. Henriquez ta bay corte pa traha bek, e trahadonan no a papia cla, nan a document’e. Pa e trahadonan documenta esaki y pone nan firma, nan tabata hopi dicidido. Nan ta sostene keto bay. E bataya aki ta un bataya di e trahadonan, mirando cu si e trahadonan tabata tin un bon relacion cu e supervisor, lo nan no tabata tin mester di un sindicato. Y e trahadonan a afilia cerca di STA, bandonando UEA, segun Sr. Diego de Cuba.