BOSTON, Merca- E scandal di pedofilia cu a sacudi Merca a wordo revela door di e corant Boston Globe cual a wordo actualisa den e pelicula Spotlight.
E cardinal Mericano, Bernard Law, implica den un scandal grandi di pastoornan pedofiel na Merca, a muri diaranson na edad di 86 aña, despues di a sufri di un malesa pa un tempo largo, segun Vaticano a informa.
Law tabata un di e lidernan mas importante di Iglesia Catolico na Merca. E tabata tin gran influencia den nombramentonan di Vaticano den archidiosis di Merca, el a yuda marca prioridad pa Obisponan di e pais y tabata un faborito di Papa Juan Pablo II, cu a nombr’e cardinal na 1985.
Pero un investigacion di e corante Boston Globe a permiti e revelacion na 2002 con e herarkia catolico local, cu e cardenal Law na cabes, a tapa di manera sistematico y varios biaha, na un manera cinico,e abusonan sexual cometi door di casi 90 pastoor den e region di Boston. E periodistanan a uza registro di iglesia pa revela cu Law durante hopi aña tabata manda pastoornan agresor di un parokia pa otro sin avisa polis of e mayornan. E scandal a genera un conmocion grandi na Merca y catoliconan di henter e pais a exigi sa si e obisponan a haci mescos.
E storia a bin bek den lus publico cu e pelicula Spotlight cu ta conta e investigacion periodistico cu a destapa e caso y cu a gana e Oscar pa miho pelicula na 2016. Pa esaki, periodistanan cu a investiga e caso aki a gana e prestigioso Pulitzer prize mientras cu cientos di victimanan a termina ta testifica.
Pa hopi aña el a keda scondi na Vaticano y nunca el a presenta pa declara na Merca, a pesar di varios peticion di parti di husticia Mericano y nunca el a duna un entrevista.
Fuente: https://tn.com.ar