WASHINGTON, D.C., Merca- Autoridadnan di Merca ta sospecha cu un ex- agente di CIA acusa diamars di posesion ilegal di secretonan ta responsabel di algo hopi mas pio: traiciona informantenan Mericano na China, segun fuentenan familiar cu e caso di NBC News.
E ex oficial, Jerry Chun Shing Lee, di 53 aña, a wordo aresta dialuna despues di a yega New York den un vuelo di Cathay Pacific for di su cas na Hong Kong, autoridadnan federal a anuncia. Lee a cuminsa traha na CIA na 1994, cual a dun’e acceso na un sinfín di documentonan clasifica como “top secret”.
Na Augustus 2012, e acusado y su famia a bandona Hong Kong pa bolbe Merca bek, sin embargo, prome cu el a muda definitivamente, famia Lee a hospeda den hotelnan na Hawaii y Virginia, unda agentenan di FBI a provecha pa investiga e ex funcionario.
Den transcurso di su registronan, agentenan a haya den e maleta di Lee dos manuscrito unda cu e acusado a anota informacion relaciona cu empleadonan di CIA, incluyendo datonan maner nan nomber original y nan number di telefon.
Di mes manera, e schriftnan tabata tin informacion relaciona na operacionnan scondi, cu detayenan riba puntonan di encuentro of “safe house” pa agentenan di CIA.
Den caso di wordo declara culpabel, Lee, cu ya mester a comparece dilanti un tribunal di New York, ta enfrenta un posibel condena di 10 aña.
Fuente: https://laopinion.com/