Michael Cohen, ex-abogado y homber di confiansa di Donald Trump, cu tabata un di e testigonan clave di Ministerio Publico den e caso arma contra e ex-presidente Mericano, a confesa dialuna di a horta miles di dollar di e Organisacion Trump, pa presion di e ekipo legal di e ex-mandatario durante e audiencia den corte di New York na Manhattan.
“E ora abo a horta di e Organisacion Trump?”, e abogado Todd Blanche, a puntra. “Si, seño,” Cohen a responde, reconociendo di a keda cu e efectivo cu supuestamente tabata un reembolso di e pago na un empresa tecnologico.
Durante e campaña presidencial di 2016, Cohen a paga 20 mil dollar na RedFinch, pero a declara n’e director financiero di Organisacion Trump, Allen Weisselberg, cu e mester a paga 50 mil dollar. Tambe, el a horta 30 mil dollar di e compania di e ex-presidente.
Durante e prome huicio penal contra un ex-presidente di Merca, Trump a enfrenta 34 cargo di falsificacion di registro comercial. Despues di mas di cuater siman di testimonio riba sex, placa y e detayenan di accounting di su empresa, e miembronan di hurado lo por cuminsa delibera otro siman pa dicidi si e ex-mandatario ta culpabel.
E acusacionnan ta basa riba e registronan interno di e Organisacion Trump, caminda cu e pagonan na Cohen a wordo marca como gasto legal, ora cu e fiscalnan a afirma cu en realidad tabata reembolso di pago p’e silencio di e actriz porno Stormy Daniels.
Trump a declara su mes inocente. Su ekipo legal ta insisti cu no tabatin nada criminal den e acuerdo cu Daniels, ni den e forma con a paga Cohen. “No tin delito,” Trump a bisa e periodistanan, despues di a yega corte dialuna. “Nos a paga un gasto legal. Boso san con e ta marca? Un gasto legal,” el a aclaria.