NEW YORK (AP) — Michael Cohen, kende, como abogado personal di presidente Donald Trump, a yega di priminti di “acepta un bala” pa su hefe, diaranson a wordo condena na tres aña di prizon, pa un serie di delitonan cu ta inclui regla pagonan secreto na dos muhe. Según Cohen, esaki tabata ariba orden di Trump.
E sentencia tabata conforme peticion di fiscal federal.
Cohen, para su so na e mesa di defensa, a sacudi su cabes levemente y a cera su wowonan un rato ora cu hues a anuncia e sentencia.
Hues William H. Pauley III a bisa cu e abogado tabata merece un credito modesto pa a admiti su culpabilidad y coopera den un investigacion federal riba e esfuersonan di Rusia pa influi den e eleccionnan presidencial.
Prome di anuncia e sentencia, Cohen a bisa di ta asumi tur e responsabilidad pa su accionnan. E “lealtad ciego.. a hibami pa e caminda di scuridad enbes di e caminda di luz”, e ex abogado a bisa. Cohen drenta sala di corte sin papia cu e periodistanan.
E ex abogado a declara su mes culpabel di a gaña Congreso riba su gestionnan en pro di e construccion di un Trump Tower na Moscu, ya cu el a abstene di revela cu e tabata tin tratonan cu funcionarionan Ruso riba e tema, incluso ora cu campaña presidencial ya caba tabata den full swing.
Ademas, na augustus, Cohen a declara su mes culpabel di a viola norma di financiamento di campaña ora di e regla pagonan na e ex modelo di Playboy, Karen McDougal y e actriz pornografico Stormy Daniels pa nan no revela cu nan a tene relacionnan extra marital cu Trump.
Michael Avenatti, abogado diDaniels, tabata presente den corte. Avenatti a representa Daniels den un caso contra di Cohen unda cu e actriz ta exigi pa kita e prohibicion di papia riba e supuesto romance. Avenatti a bati Cohen pa lunanan largo den noticieronan di television, asegurando cu Cohen merece di bay cera.