Staf di e unidad di “Financial Market Integrity” cu ta forma parti di World Bank ta na Aruba pa asisti Gobierno di Aruba den evaluacion di e riesgonan nacional asocia cu labamento di placa y financiamento di terorismo. Pa ehecucion y coordinacion di e evaluacion aki a establece un grupo di trabou precidi pa señora Kiki van der Werf di Banco Central di Aruba.
E evaluacion tin como proposito identifica e riesgonan primario di labamento di placa y di financiamento di terorismo na Aruba. Lo ehecuta un analisis completo cu lo facilita diseño di un strategia adecua y mitiga accionnan. Esaki lo yuda aloca recursonan necesario pa un combatimento contra labamento di placa y financiamento di terorismo mas efectivo y eficiente, mientras cu lo cumpli cu e standardnan internacional estableci pa, entre otro, e Financial Action Task Force (FATF).
Gobierno di Aruba ta organisa, lidera y realisa e proceso di evaluacion di riesgo tumando e instrumento di auto-evaluacion di e World Bank. Durante e bishita aki, staf asigna di World Bank lo asisti Aruba den compronde e metodologia di auto-evaluacion y uzo di e instrumento aki. Di e manera aki, Aruba lo por genera e capacidad pa por evalua e riesgonan aki den futuro sin of cu ayudo minimo di agencianan/institutonan di exterior. E metodologia di auto-evaluacion ta encera colaboracion estrecho entre diferente agencianan gubernamental y representantenan di e sector priva y publico.
Desde 2010, World Bank a sostene ocho pais den nan proceso di auto-evaluacion igual na esun cu e lo asisti Aruba den e proximo dianan.