Durante encuentro den sala di Parlamento cu minister di Husticia siman pasa, Marisol Lopez-Tromp, parlamentaria di POR, a cuestiona cierto practicanan cu por facilita abuso pa loke ta trata permisonan di estadia y laboral na nos isla.
E parlamentaria a pidi e minister pa duna su opinion tocante e asina yama ‘anker baby’s’, unda cu un baby ta para garantia pa su mayor(nan) cu ta ilegal na nos isla pa nan por legalisa nan situacion y keda na Aruba. E kier sa si esaki en berdad ta un practica cu ta tuma luga y si ta asina for di ki tempo y dicon a bin cun’e, pasobra supuestamente un persona cu ta para garantia lo mester por tin suficiente medionan financiero, ademas cu e tipo di practicanan aki lo por contribui na un aumento di matrimonionan ficticio.
Intencion no ta pa prohibi hende pa casa, pero por pone condicionnan manera por ehempel mustra cu nan tin suficiente medionan financiero pa mantene nan mes si kier bin cu un hende for di exterior. Cu esaki ta garantisa un cierto calidad di bida no solamente pa nan, pero pa eventualmente yiunan den futuro. Si no haci esaki, na final ta nos tur como ciudadanonan lo mester bay pague, pasobra si un persona no por mantene, ta comunidad ta mantene.
Continuando, Lopez-Tromp a expresa “ta menciona den maneho di DIMAS cu si bo ta un mayor soltero di un yiu di tera y bo no ta biba hunto cu e mucha bo por haya un vergunning basta cu bo ta paga alimentatie segun e ‘family life principe’. Cua ta e ‘family life principe si bo no ta biba hunto? Alimentatie awendia por wordo paga via banco, bo no tin nodo di ta necesariamente na e pais. Si bo no tin e relacion mas, bo no ta casa mas, bo no tin e amor mas, bo no ta biba mas, con mi tin cu compronde e maneho aki? Segunmi e ta mustra hopi aantrekkelijk pa si un hende kier abusa di dje”.
Un punto cu sigur a haya hopi atencion ta e parti di multa. Marisol Lopez-Tromp ta cuestiona e echo cu ora un persona wordo haya ilegal na un establecimento, comunidad tin cu paga e gastonan di e persona aki for di momento cu e wordo deteni te ora cu e bandona nos isla. “Mirando cu e persona a wordo deteni na un establecimento, dicon no ta e doño di e establecimento aki esun cu ta carga cu e gastonan? Si ta un ley mester cambia pa esaki sosode, lo ta bon pa laga Parlamento sa pa por cambie, pasobra no ta husto pa comunidad. Ora e compania tin su ganashi e no ta partie cu pueblo y dicon ta pueblo mester paga pa e falta di responsabilidad di e compania?”
Minister a informa cu a instala un comision pa combati e fenomeno di matrimonionan ficticio. “Te cu awor aki mi tin entendi cu ta Censo ta haci esaki y mi a scucha directora di Censo hopi cla na radio unda e ta vocifera su preocupacion mencionando cu mester pone un cierto norma di ingreso financiero pa e hendenan cu ta casa caba y kier bin tin biaha hasta cu yiunan y ta dificil pa nan akinan y algun caso ta trata di matrimonionan ficiticio. Mi kier sa cual ta e departamentonan cu ta den e comision menciona, si ta solamente esnan cu ta cay bou husticia of tin otronan manera social, salud, labor. Tambe cual ta e personanan cu ta den dje, pasobra como presidento di e comision di Asuntonan Social, Salud y Famia, mi lo kier invita e comision na Parlamento pa splica con nan ta bay haci nan trabou, con nan ta bay anda cu e reto aki y eventualmente Parlamento lo por dunanan un man tambe biniendo cu cierto adaptacionnan den ley”.
Den datonan di Censo y den diferente rapport por wak cu hopi di e migrantenan cu ta bin biba y traha na Aruba ta personanan cu tin un promedio di 38 aña y segun e cifranan 77% di nan ta bin cu e intencion di keda biba na Aruba y ta bisa cu nan intencion ta pa ‘settle’. Solamente 19.4% a indica cu nan lo regresa eventualmente nan pais y 3.6% kier sigui bay over pa Hulanda, Merca of Canada cu e ‘hope to find a better job in other country’.
Teniendo na cuenta e datonan aki, Marisol Lopez-Tromp como ultimo punto di su disertacion a elabora riba e estadia di turista. “Den e maneho cu tin riba e website di DIMAS ta poni cu e ambtenaar di migracion ta stipula e condicion of ta stipula e solvabilidad financiero. Mi kier sa con esaki ta wordo midi, ken ta midie? Pasobra si un persona ta bin pa algun luna mi kier sa con den practica ora e persona drenta ta midi e solvabilidad financiero di dje pa por evita loke ta sosodiendo caba cu hopi hende toch ta dicidi di keda y eventualmente bay traha. Mi pregunta ta si e personanan aki cu a drenta como turista y a bay traha ilegalmente si gobierno sa dunanan permiso despues di esaki? Cuanto caso tin asina?”
Lopez-Tromp ta spera cu bin claridad y cambionan unda cu ta necesario pa por proteha nos comunidad di e abuso cu lo por tin di nos reglanan di admision y estadia.