Fraccion di MEP a tene nan conferencia di prensa na Hulpbestuurskantoor na Santa Cruz e siman aki. E mesun lugar caminda e intento di atraco a tuma lugar diamars atardi.
“Ora cu atracadornan yega te na e extremo di atraca un departamento di gobierno, ta mustrabo cu a crusa un limite. Ta mustrabo cu nan ta kere cu ta facil pa atraca hasta un departamento di Gobierno. Y esaki ta dimas.
Mi ta contento cu pa prome biaha den hopi tempo e prome minister di e pais aki a sali y mustra su cara atrobe. Y mi ta di acuerdo cune: e atraco aki ta espantoso! No e atraco aki so, sino tur atraco ta espantoso. E forma con criminalidad a sali for di control ta espantoso.
Pero loke ta mas espantoso ta cu Gobierno di e propio Mike Eman no ta haci nada pa caba cu e situacion espantoso aki.
Mike Eman ta esun responsabel pa tene man riba cabes di minister Dowers cu a faya den tur sentido. Mike Eman ta esun cu a faya den pone orden den su gabinete y laga prioridadnan kiboca dicta nan agenda.
Ki mishi tin miyones pa un Green Conference y no tin placa pa cumpra bullet proof vests pa polis? Ki mishi tin miyones pa un festival tras di otro y no tin placa pa cumpra “rape-kits” y apunta un vertrouwensarts? Ki mishi tin miyones pa Mike Eman biaha mundo rond y no tin placa pa Baby Lunah haya un tratamento digno?
Nos pais su prioridadnan ta totalmente kiboca y den esaki nos conose un responsabel principal: Mike Eman. Y ta danki na e prioridadnan kiboca ey, Aruba ta mas insigur cu nunca. Nos no ta safe mas den nos cas, nos no ta safe mas riba caya y awor nos no ta safe mas na pia de trabou tampoco. Esey ta realmente e parti espantoso!