Parlamento a yama minister Dowers den Parlamento diaranson ultimo. E minister a bin Parlamento cu varios director di departamentonan. Parlamentarionan a haci hopi pregunta, y e minister a tuma dos ora pa contesta. E conclusion despues di henter un dia di reunion ta cu nos no tin un problema di crisis. Cu cos ta OK.
E minister a tira culpa riba hopi otro minister. Segun minister Dowers, e no tin culpa di insiguridad. Ta minister Sevinger tin culpa pasobra nos fronteranan ta free for all. Ta minister Otmar Oduber tin culpa pasobra e ta trece turistanan cu ta causa problema. Ta minister Bermudez tin culpa pasobra e no ta duna Dowers e placa cu e mester. Ta famianan tin culpa, pasobra nan no ta cria nan yiunan bon. Tabata obvio cu mientras minister Dowers tabata purba core di su responsabilidad, criminalnan ta sigui fiesta. Di un banda e tin rason si, pasobra e gran culpabel ta Mike Eman pa via di su falta di liderasgo ta laga cosnan sali for di man asina.
HELICOPTER
Ultimo dianan hopi hende ta comenta cu si e radarnan y helicopter cu ex-minister Rudy Croes a pone tabata funciona, awe e situacion no ta asina. E helicopter tabata tin un rol preventivo hopi importante. El a elimina e factornan critico cu tabata combati criminalidad y awe henter pueblo ta sufri.
Minister Dowers a declara den Parlamento cu Aruba no tin helicopter mas pasobra e mester a “bezuinig”! Kiermen, minister president por gasta miyones pa biaha mundo rond den su ‘green’ fluff, pero minister Dowers mester a baha gasto, y en bes di baha gasto riba otro cos, el a baha gasto riba e helicopter. Mientras tanto nan no a bin cu nada na su luga y nos pais ta insigur, y hasta nos mester presta helicopter di Corsou.
MINISTER DOWERS A FAYA
Minister Dowers a faya, el a faya door di ignora critica y conseho di otronan, el a faya di resolve e escases di polis cu nos tin, el a faya di convense su gobierno cu un plan y pa pone mas fondonan disponibel pe. Un falta di liderasgo, boluntad y capacidad. Cu esaki minister Dowers a crea e ambiente ideal pa criminalnan take over den nos pais. Tin solucionnan riba mesa, pero Gobierno no kier haci caso di nan.
NOS KIER NOS SEGURIDAD BEK
P’esey nos ta bisa awor mas cu nunca. Nos kier nos siguridad bek.
Pone warda nos costa bek y duna nan autoridad pa actua cu man firme pa tene nos costanan bou control
Pone e radarnan bek pa detecta boto chikito y asina stop importacion ilegal di arma, droga y hende
Pone e helicopter bek cu tin un efecto preventivo, y por sigui atracadornan mesora
Pone e Visibility Teamnan bek, pa haci nos areanan turistico mas sigur
