Parlamento prome cu reces lo trata den pura 5 ley riba un solo dia. No ta exclui e posibilidad cu lo no keda cla riba e mesun dia, pero di tur forma ta un acto sumamente iresponsabel pa forsa 5 ley den un solo dia.
E leynan ta:
1 presupuesto di Raad van Advies 2017, despues di a pospone 4 biaha. Nos ta contento cu porfin e ley aki ta bai wordo trata, y nos ta spera cu e presidente di Parlamento no pospone esaki pa di 5 biaha. Ta un falta di respet pa e instituto halto di estado aki cu Parlamento no a trata e ley aki ainda.
2 cambio di instalacion di ministerionan despues cu Otmar Oduber a tuma su retiro. Fraccion di MEP su opinion ta cu no mester a apunta un di 9 minister, mester a lag’e na 8 minister. Ademas, nos kier sa kico ta bay pasa cu tur e coordinadornan di ex minister Otmar Oduber.
3 presupuesto supletorio 2016, cu ta ilustra e cambionan riba presupuesto pa e gastonan cu Gobierno a surpasa. Mester remarca cu e ley aki tin un conseho negativo di Raad van Advies, cu ta haya esaki no realistico y ta urgi Gobierno pa no manda e ley aki Parlamento. Sinembargo Gobierno no ta hasi caso di esaki, y a mande asina mes!
4 cuenta anual 2015, cu ta mustra cuanto Gobierno a surpasa e presupuesto pa 2015 tambe, cu tambe tin un conseho negativo di Raad van Advies.
5 cambio di ley di motorrijtuigenbelasting, pa asina duna Departamento di Impuesto mas autoridad pa cobra e suma aki. Despues di e anuncio cu mas di 60% di automobilistanan a keda sin paga e belasting aki, gobierno kier haya mas poder pa manda cobransa den caso cu un persona no paga, y persigi pa bo paga e belasting aki. Locual cu Gobierno no ta tene na cuenta ta cu hendenan no tin placa, economia ta den recesion, placa no ta yega, y esey ta refleha su mes tambe den pagamento di belasting.
Fraccion di MEP ta haya un acto sumamente iresponsabel pa trata 5 ley riba un mesun dia. “Pa esnan cu no ta interesa den hasi nan trabou, no ta problema pa prop 5 ley pareu riba un dia. Pero pa nos cu si kier hasi nos trabou, e ta algo casi imposibel pa logra. Nos ta prepara y nos lo trece e dolornan di comunidad padilanti” lider di MEP Evelyn Wever-Croes a duna di conoce.