Partido Movimiento Electoral di Pueblo MEP ta felicita pueblo di Aruba cu re-apertura di e refineria. MEP semper a kere den e pilar industrial di nos refineria y nunca a perde e fe y speransa di su re-apertura. P’esey e biahanan cu e refineria a cera su porta, na 1985 y na 2012, integrantenan di MEP a haci tur esfuerso pa su re apertura, e tempo aya den gobierno y awor den oposicion.
Si no tabata pa MEP ya e refineria a wordo desmantela na 1986 pa Henny Eman. Y awor atrobe pa Mike Eman pasobra AVP a cuminsa desmantela e refineria caba.
Na aña 1985 ora Lago a cera su portanan, Betico Croes den feliz memoria a compromete cu si tin 1% oportunidad pa habri e refineria, nos lo lucha te haci’e 100%. Esaki a logra tambe na aña 1990 bou liderasgo di sr Nelson Oduber.
Ora e refineria a bolbe cera su porta na 2012, nos di MEP a ripiti e mesun palabranan y nos a compromete pa haci e 1% bira 100%. Y mientras cu otronan a perde speransa y a cuminsa cu desmantelacion di e refineria, nos di MEP a sigui lucha te convence e ultimo mandatario den gabinete Mike Eman II cu mester haci tur esfuerso humanamente posibel pa re apertura.
Y awe e 1% a bira 100%.
Nos nunca a perde speransa y pesey dia 27 Februari 2015 nos a mobilisa nos pueblo den un accion relampago y centenares di persona a mobilisa mesora pa e gate di e refineria na San Nicolas. Pabien na cada un di e personanan cu nunca a perde speransa y a keda na gate di refineria te marduga pa manda e señal pa Valero pa stop e desmantelacion.
Tambe un pabien y danki na e grupo PARA cu ta esunnan cu a trece mas speransa den comunidad pa cu re-apertura di e refineria.
Finalmente pabien y danki na tur persona cu a traha incansablemente pa por a logra e re-apertura, entre nan minister Mike de Meza y sr Alvin Koolman.
Tin hende cu ainda tin nan duda den e refineria. Nos tambe tin nos preocupacionnan. Sinembargo nos mester ta honesto tambe cu si no ta pa e crecemento economico cu e refineria lo trece, gabinete Mike Eman lo mester a bin cu medidanan nobo contra pueblo di Aruba.
Den nomber di e gran famia di MEP un pabien na henter e pueblo di Aruba.