Manera ta conosi Parlamento a yama minister Benny Sevinger pa duna cuenta. Lider di MEP Evelyn Wever-Croes cu prueba den man a denuncia e actonan dudoso y cuestionabel di e minister y esnan cerca di e minister.
Lider di MEP a presenta prueba di negoshi di tereno na momento cu e minister a duna 42 mil m2 na un compania FANTASMA pa construi hotel na Seroe Colorado. Aki no ta trata di e hotel di Otmar Oduber, sino un otro hotel cu hendenan di Benny Sevinger ta envolvi aden.
E persona cu a haci e peticion ta un hoben, sobrino di doño DJ Canal 90. El a manda un carta pa minister pa pidi 42 mil m2 sin duna mas documento. No tin mapa, ni business plan, ni garantia di banco, y pa colmo ni e compania cu ela firma den su nomber tabata existi. Pues un compania fantasma. Pero Benny Sevinger a aproba esaki e mesun dia si!
E peticion a wordo entrega dia 15 di September 2014, el’a wordo aproba mesun dia pa e minister sin cu e minister por a wak cu e compania no tabata existi! Pasobra si e minister a simplemente GOOGLE riba website di Camara di Comercio e por a mira cu e compania NO ta existi. Cu e compania ta FANTASMA!
Ta 5 November 2015, kiermen un luna y mey despues cu minister a duna 42 mil m2 na e compania FANTASMA, e hoben a core bay lanta e compania na notario.
Esaki ta un procedura masha masha straño mes. Cosnan masha dudoso a tuma lugar akinan. Abo no ta kere cu ta bon pa investiga esaki?
Pa colmo esaki no ta e unico ehempel cu Lider di MEP a trece padilanti di terenonan cu a bay pa companianan FANTASMA. Ta varios ehempel el a duna.
P’esey MEP a entrega un mocion pa laga investiga e minister y su actonan cuestionabel aki. E reunion ta continua diabierna awor 1.30 pm. E momento ey e minister mester bay duna splicacion dicon el a regala 42 mil m2 na un compania FANTASMA,” lider di MEP Evelyn Wever-Croes a duna di conoce
.
