Evelyn Wever-Croes: Minister Benny Sevinger den Parlamento diaranson mester duna cuenta di negoshi di tereno

Lider di partido MEP Evelyn Wever-Croes a informa cu minister Benny Sevinger ta den Parlamento diaranson 14 September 10:00 am pa sigui duna cuenta tocante e negoshi cu tereno. E reunion a cuminsa siman pasa y fraccion di MEP a pone varios prueba riba mesa.
Den comunidad tin hopi ta wordo papia di hendenan cerca di e minister cu ta haya terenonan grandi den erfpacht pa despues bende esakinan na inversionistanan. Y den e proceso aki nan ta gana hopi placa. Esaki ta algo cu no ta permiti na Aruba. Na Aruba no ta permiti pa haci ganashi cu tereno di pueblo.

CON E NEGOSHI AKI TA BAY?
E coordinadonan di minister mes ta busca terenonan grandi cu por wordo duna den erfpacht. Especialmente e area di Sasaki ta hopi popular.
E coordinadonan ta yama un persona, doño di radio y campañado di partido AVP, y bis’e cu e por bin scoge.
E señora ta bay scoge y despues ta entrega su peticion.
Minister ta aproba e peticion mesora y cu e aprobacion di minister den man, e señora ta bay bende e tereno.
E gastonan di e señora ta minimo, pero e benta ta bay tin biaha pa miyones.
E señora no ta pone e terenonan riba su nomber tur ora. E ta core lanta un compania pa e pasa e tereno riba nomber di e compania, y despues bende e accionnan den e compania.
Su nomber no ta aparece den registro di Hypotheekkantoor e ora, pero si como shareholder di e compania.
Y una bes e inversionista haya e compania cu e tereno, e ta manda e suma gigantesco di placa riba cuenta di e señora na Miami.
Mientras tanto e señora ta gana hopi placa, y no tin tereno pa cuidadanonan di Aruba haya. Esaki ta e causa di hopi malcontento den nos comunidad ya cu tin 11 mil persona ta warda pa un pida tereno.
Minister a haya oportunidad den prome tanda pa contesta e acusacionnan den su contra, pero e minister no a hasi esey. En bes di duna splicacion y responsabilidad pa su maneho, e minister a bin cu cantidad di documento bieu di tempo di gobierno di MEP. Por cierto, e documentonan ey ta demostra cu tempo di MEP si tabata sigui e caminda indica segun ley y transparencia.
Diaranson 14 September 10or e reunion ta continua den di dos tanda, cuminsando cu e 7 parlamentarionan di MEP. Sigui e reunion atraves di Canal 46 Radio 107.5 FM of website di Parlamento www.parlamento.aw

Comments

comments