Lider di MEP Evelyn Wever-Croes tambe a reacciona tocante e welga na Serlimar. “Nos ta sostene e lucha di empleadonan na Serlimar. Ta un acto hopi cruel y di sin gevoel ora un prome minister ta anuncia den porta di fin di aña cu ta bay cera Serlimar poniendo asina e pan di tata y mamanan di famia na peliger. Gabinete Mike Eman a faya e habitantenan di bario, Mike Eman a faya e empleadonan di Serlimar, y gobierno a faya henter Aruba ora ta trata e tema aki. Un partido cu a promove tur cos “green”, pero cu su hechonan ta demostra net contrario. Mike Eman y su Gobierno a inverti miyones di placa di pueblo den promove un soño “green”, pero no por a realisa nada di e soño ey. Prueba ta e candela y huma cu ainda tin na e dump na Parkietenbos, siendo cu na 2009 bou di gobierno di MEP a paga e candela ey. Ta e negligencia di gabinete Mike Eman a pone cu nos a cay bek na e situacion prome cu 2009. Miho el’a inverti e placa ey den haci Aruba mas sigur, of den enseñansa, of den construi cas pa pueblo” segun lider di MEP.
HABITANTENAN
“Nos di MEP tin 7 aña ta bishita e vecindario, y ta exigi atencion pa e problema cu e habitantenan ta biba aden. Ultimo biaha cu ami a bay dump pa denuncia e problema, nan a manda bewaker core cumi, pasobra mi no tabata mag di graba eynan. Mi coleganan tambe a wordo cori na mal forma. Nos peticionnan pa reuni cu Serlimar te dia di awe no a wordo honra. Tur esaki den un intento di parti di gobierno di AVP pa sconde e problema. Porfin e plegaria di habitantenan a wordo scucha, y Mike Eman a anuncia cu lo cera dump dia 1 di Januari 2017, pero a costo di kico? Y pa beneficia ken?
PROMESA FALSO, SIN ESTUDIO NI PLAN
Awor cu empleadonan a pone trabou abou a bin resulta cu Mike Eman a djis haci un promesa falso, un di e tanto nan, pasobra e no tin ningun plan kiko pa haci cu sushi di Aruba despues di 1 di Januari 2017. Claro cu nos tur ta contento cu e habitante y trahadonan no mester sufri mas bou di e condicionnan ey, pero e promesa ta realistico? Y kico ta bin na su luga?
ECOGAS NO POR PROCESA TUR SUSHI DI ARUBA
Awor Mike Eman kier regala tur sushi di Aruba pa Ecogas, siendo cu den un reunion recien cu Ecogas nan a mustra nos cu Ecogas NO por procesa tur e sushi di Aruba. Kiermen eynan bo ta mira cu Mike Eman a core bisa algo cu e no por cumpli cun’e.
Ademas, con e por bay regala tur sushi na Ecogas, siendo cu esey ta e fuente di entrada pa Serlimar?
Mike Eman en todo caso a demostra un cos: cu e ta bisa un cos y e ta haci otro cos. Cu e no tin interes at all pa yuda habintantenan, ni yuda Serlimar. Mike Eman su UNICO interes ta complace esnan cerca di dje, y ken cu e mester trapa riba dje den su caminda, e ta haci’e. den porta di fin di aña, esaki ta un acto hopi cruel pa haci contra habitantenan, pero mas aun contra empleadonan di Serlimar” Evelyn Wever-Croes a duna di conoce.