Parlamento a cuminsa trata e presupuesto di finansas dialuna ultimo. Lider di MEP a duna prome un analisis di e presupuesto 2017 den cual por mira cu gastonan ta subi cu 65 miyon florin, pero no ta cosnan cu ta brinda alivio na pueblo. E gastonan di biahamento, fiestamento y propaganda a sigui haltisimo y pa colmo awor mester paga pa e aventuranan financiero di Eman. Tur e gastonan aki ta wordo compensa cu cobramento di belasting mas severo. Awo caba e cobramento ta asina severo cu e ta inhumano, pa otro aña e ta bay bira peor. Tambe e gastonan lo wordo cubri cu placa di Citgo y 26 miyon dividendo di companianan estatal.
ALIVIO RIBA TERENO DI BELASTING
Lider di MEP Evelyn Wever-Croes den prome ronde a entrega 3 mocion:
1. Pa elimina belasting riba pensioen di biehes. Minister Bermudez a indica cu el a cuminsa caba cu brinda un poco alivio, pero e no ta suficiente. Mester elimina e belasting riba e pensioen.
2. Pa baha e peso di studiantenan cu mester paga fiansa di estudio bek. Evelyn Wever-Croes a mustra riba e areglo di Corsou, cu ta haci e pagonan aftrekbaar te 10 mil florin pa 10 aña maximo. Minister a priminti cu lo regla esaki pronto.
3. Pa gobierno paga bo interes si bo mester haya placa bek. Mescos cu ora abo paga bo mester paga interes, asina tambe mester cambia e ley pa ora bo mester haya placa bek, gobierno pagabo interes.
E votacion riba e mocionnan lo tuma luga riba e ultimo dia di reunion, probablemente pa fin di otro siman. Pero ta imposibel cu tin un hende den Parlamento cu por ta contra e mocionnan aki.
“Tur e proposicionnan aki ta parti di nos programa di partido 2017-2021 y si Parlamento no sostene e mocionnan, nos si lo percura pa haci nan un realidad. Pasobra Aruba merece miho” lider di MEP Evelyn Wever-Croes a duna di conoce.