Prome Minister di Aruba, Sra. mr. Evelyn Wever- Croes recientemente tabata na Washington, pa trata e situacion di Citgo y tambe e situacion di e fluho di migrantenan Venezolano, pa Aruba.
A trata e temanan di safety & security cu deputy Cooper, tambe pa tin un miho bista di infiltracionnan na Aruba tambe, di gruponan terorista. E ta un tema cu ta hopi preocupante na Venezuela. Mas y mas gruponan terorista ta infiltrando na Venezuela. Y Aruba no kier niun di nan akinan. A keda di haya mas informacion, a pesar di cu tin un miho cooperacion, pero ta pa evita cu cualkier un di nan ta scondi mei mei di esunnan cu ta pidi asilo of esunnan cu ta bin den boto. Esaki ta hopi importante, ya cu no por laganan infiltra aki na Aruba.
Tambe a papia tocante e fluho di placa, ya cu pa e Mericanonan ta importante con e placa di e Venezolanonan ta fluho, pasobra cu nan tin meta di cera e fluho di placa di esunnan cu nan kier pa no tin mas grip ariba entrada.
Eynan tambe a haci cierto palabracionnan di con Aruba por coopera den esey. Pero a papia mas over inteligencia, con pa comparti informacion y pa haci esaki lihe.
Pa loke ta rehabilitacion di e refineria, a sali na cla cu nunca tabata tin e placa pa haci e rehabilitacion. Prome Minister a splica cu el a haya informacion aki despues di su reunion na Merca y el a mesora via e canalnan oficial via e Embahada di Hulanda na Washington, pa nan por haya un confirmacion di esaki. Si e contenido di e carta aki ta corecto, Sra. Wever- Croes a bisa di manera cauteloso, lo tin hendenan cu lo tin problema hopi serio di responsabilidad di con tur cos a bay.
Sra. Wever- Croes a bisa cu e ta papia solamente pa Aruba y e deal cu a wordo cera. E tabata obvio cu esunnan cu a firma e deal aki, cu no tabata tin e fondonan mes pa esaki, ta papiando di cosnan serio. Pero p’awo e no pro bisa nada, mas bien e ta sperando pa haya un confirmacion cu e informacion ta corecto. E di dos stap ta pa mira si e ex gobernantenan tabata na altura di esaki.
Tin hopi informacion cu ta falta. Door cu no a haya un traspaso debido, tin hopi informacionnan cu nan no a haya, y un di esakinan ta e aviso di CBS tocante e construccion di e hotel na San Nicolas.