Partido MEP un biaha mas ta yudabo yena bo formulario di belasting, cuminsando e siman aki. “Mi ta hopi contento cu nos por anuncia cu un biaha mas MEP ta bai yudabo yena bo formulario di belasting 2016, cu bo tin te dia 1 di Oktober pa entrega.
Paga belasting ta deber di nos tur, pero no paga dimas.
Pa evita cu bo ta paga dimas, bo mester yena bo formulario corecto y entrege na tempo. Si bo mester di ayudo, na Cede di MEP nos tey pa yudabo un biaha mas. Diamars dia 5 di September di 6or pa 9or nos ta cuminsa. E campaña lo dura dos siman, riba diamars y diahuebs di 6 or pa 9 or, y diasabra di 9 or pa 1 or.
Pa por yudabo yena bo formulario, bo mester trese lo sigiente:
Pensionado: si bo ta pensionado bo mester haya un resumen anual (jaaroverzicht) di SVB cu ta bisa cuanto bo a ricibi total den aña 2016. Tambe si bo tin mas pensioen, mester e resumen anual di e instituto di pensioen ey pa prueba cuanto pensioen bo a ricibi na 2016.
Salario: Si bo ta traha y bo a gana salario den 2016, bo mester un resumen anual di bo donjo di trabou (jaaroverzicht of Loonbelastingkaart) cu ta menciona cuanto bo a gana den 2016. Si bo a traha diferente caminda, bo mester busca e resumen ey na cada donjo di trabou.
Prestamo Na Banco Of Otro Instancia: Si bo tin un prestamo na banco, pidi e banco un prueba cuanto interes bo a paga. Ta importante pa si bo tin hypotheek, pa ta skibi exactamente cuanto e interes di e hypotheek ta.
Credit card y Island Finance tambe ta dedusible, pues busca e pruebanan di eseynan tambe.
Seguro Di Bida: Si bo tin seguro di bida, pidi e compania pa dunabo un prueba cuanto prima bo a paga di seguro di bida. Esey tambe ta yuda pa baha bo belasting.
Yiu Ta Studia Den Exterior: Si bo tin yiu ta studia den exterior bo por haya un suma mas halto pa dedusi di bo belasting. Pero bo mester entrega un prueba cu bo yiu tabata inscribi na e scol of universidad fin di 2016, y bo mester manda prueba di gastonan cu bo a paga pa bo yiu.
Gasto Di Notario: Si en caso bo a bai notario pa sera un hypotheek of aumenta bo hypotheek, e gastonan di notario tambe ta dedusible. Si bo a bai notario pa cumpra of bende un tereno of cas, of pone erfpacht, e gastonan ey NO ta dedusible, solamente si ta pa un hypotheek. Corda trese e recibo di notario, pasobra esey tambe ta baha bo belasting.
Paga belasting ta un deber di nos tur, pero no paga dimas belasting si. Acudi na Cede di MEP entranda diamars 5 di september, 6or atardi, y cu gusto nos lo yudabo, completamente gratis.