Dialuna 17 December porfin Parlamento a trata e presupuesto di Raad van Advies pa 2017, despues di 4 biaha cu e reunion aki a wordo posponi. Aparte di esaki Parlamento a trata 4 ley mas riba e mesun dia, dos di nan cu conseho sumamente negativo di Raad van Advies y Algemene Rekenkamer. AVP a ignora e consehonan negativo y a press toch pa aproba e leynan aki lihe. Lider di MEP Evelyn Wever-Croes a comparti su opinion al respecto. “Esaki ta un prueba mas dicon mester caba cu e stempel parlement, pa realmente trece orden y respet bek. Ta obvio cu e parlamentarionan di AVP no tin interes den haci nan trabou debidamente. Nan no ta studia nan leynan, nan no ta participa na e debate, unico cos cu nan ta haci ta insulta, tira palabra y haci desordo, strobando esnan cu si kier haci nan trabou”.
Actualmente Gobierno no ta respeta Parlamento y Gobierno no ta respeta institutonan halto di estado manera Raad van Advies. Dicon mi ta bisa esey ta pasobra gobierno ta manda riba Parlamento y e mayoria den Parlamento no ta haci nada pa frena esaki. Reunionnan ta wordo yama solamente ora gobierno pidi. Ora oposicion pidi reunion, nan no ta wordo yama. Reunionnan ta wordo yama apesar cu Gobierno no a duna Parlamento documento ni informacion, y no cuanto fraccion di MEP den oposicion pidi, no ta haya documento.
E Gobierno di AVP ta e gobierno cu mas a nenga y neglisha consehonan di Raad van Advies. Pa duna un ehempel: den 2015 Raad van Advies a duna 10 biaha un conseho negativo, den nan terminologia, dictum 4 of dictum 5. Gobierno no a haci caso di e consehonan negativo aki, pero a persisti pa pasa e leynan. Raad van Advies entre otro a duna consehonan negativo pa e presupuestonan di pais Aruba, y e presupuestonan supletorio, tambe pa e ley di CAFT, e ley di parkeermeter, e ley di all-inclusive, begrotingnan di DOW pa algun aña caba y e ley di cambio di color di bandera. Tur e leynan aki sr. Mike Eman a aproba y a insiti pa pasa, irespecto e consehonan negativo di Raad van Advies.
Y locual ta mas lamentable ta cu e mayoria den Parlamento no ta permiti Parlamento ehecuta su trabou manera debe ser. E mayoria di AVP, cu e presidente di Parlamento na cabes, ta stroba henter e Parlamento di realmente control a gobierno. Parlamento cu mester ta e instituto cu ta salbaguardia nos democracia, ta esun cu ta trapa e principionan democratico constantemente.
Aruba mester di un cambio den e sistema actual. Pa nos Parlamento por funciona debidamente, nos mester kibra e tradicion actual y cambia e leynan existente. Nos pueblo ta anhela pa un biento fresco, pa un cambio, pa democracia wordo realmente sirbi. Nos cuidadanonan kier por biba trankil sabiendo cu nan representantenan den Parlamento ta salbaguardia nan interesnan.
Ta solamente cu e cambionan asina, nos lo soluciona e problema” Evelyn Wever-Croes a bisa.