Minister Paul Croes a manda informa sindicatonan cu awor si e ta bay cambia articulo 1613x y ta bay kita siguridad di trabou di trahadornan den contrato laboral. MEP a reuni cu sindicato FTA den siman, y den esey nos tabata hopi cla cu e sindicato.
E articulo aki a wordo introduci den aña 1992. E tempo ey e minister encarga cu labor tabata sr Freddi Refunjol y e minister encarga cu husticia tabata sr Hendrik Croes. Nan a bin cu e ley ey pasobra den e programa di partido MEP den eleccion na aña 1989 esey tabata un di e compromisonan di MEP, pa brinda e clase trahador mas proteccion, pa cual a haya sosten abrumador. Prome cu esey tabata tin hopi abuso ta tuma lugar contra e clase trahador, y p’esey a trece e cambio. Awor Paul Croes kier kita e proteccion ey. Desde e tempo ey caba gobierno di MEP a duna di conoce na mundo henter cu aki na Aruba nos ta respeta clase trahador y nos ta duna clase trahador proteccion. Tur inversionista cu kier a bin establece nan mes na Aruba tabata sa cu esey ta nos standard, y nada a cambia den esey. Pues ningun gobierno tin e derecho pa torno na proteccion di trahadornan awor.
Un doño di trabou cu awor kier kita un trahador cu NO ta funciona, por haci esey caba cu e leynan existente. E mester djis cana e caminda legal. Un doño di trabou cu awor kier kita un trahador cu SI ta funciona, no por haci esey y no ta suppose di por haci esey tampoco. Wel, esey ta locual cu minister Paul Croes kier a haci. Nos ta contra esey.
E argumentonan cu gobierno a duna tampoco ta convence nos, pasobra sin un maneho concreto pa brinda trabou na hobennan y senioren, bo lo no logra esaki ni si bo cambia e ley.
Ademas, e cambio di ley no ta crea mas cupo di trabou, e ta brinda talbes mas oportunidad di empleo despues cu kita otro hende for di trabou. Pues ta un tipo di stoelendans ta bay tin.
Y finalmente mi ta referi na locual e experto di IMF sr. Debrun a trece p’adilanti durante e evento anual di Camara di Comercio aña pasa, cu pa un flexibilisacion di mercado laboral ta exitoso, gobierno mester por brinda cierto garantianan, y el a menciona como ehempel, un seguro contra desempleo. Aruba no ta asina leu ainda.
Awor Paul Croes kier trece e cambio aki durante reunion di cambionan di Codigo Civil, sin busca conseho di Raad van Advies of SER. Esaki ta muestra di su mala fe, y ta algo cu Parlamento henter mester rechasa. Pa e motibonan aki, y mucho mas, MEP ta contra e cambio di ley y lo no permiti ningun gobierno torno na derecho di trahador”, lider di MEP Evelyn Wever-Croes a duna di conoce.
