Evelyn Wever-Croes: Gabinete Mike Eman cu otro presupuesto irealistico

Parlamentarionan di MEP den e dianan aki ta studiando e presupuesto pa 2017, cu a wordo entrega na Parlamento luna pasa. Por nota cu no tin mucho cambio compara cu otro añanan.

ENTRADA VS GASTO
Entradanan di gobierno ta wordo premira cu lo aumenta den 2017 basa riba un crecemento economico di 6.1% cual tanto Raad van Advies como CAFT ta considera demasiado halto. Tambe pasobra lo saca 26.6 miyon florin di dividend di companianan estatal, compara cu 19 miyon aña pasa! E gastonan total di gobierno a aumenta den 2017 te na 1,388,880.100, cual ta 52 miyon florin mas cu aña pasa, y un biaha mas ta mas halto cu nan propio plafond di 1,350,000,000 cu gabinete Mike Eman a pone como meta. E malgastamento di placa den coordinado, biahamento, fiestamento, propaganda y consehero a continua. Asina tambe cantidad di gastonan cu ta wordo cuestiona nan necesidad den e tempo di crisis aki.

DEFICIT 0.5%?
E deficit mester ta 0.5% of menos, segun e ley di CAFT, y segun gobierno nan a logre, pero basa riba un crecemento economico mucho halto; recientemente Banco Central a downgrade e crecemento economico di e aña aki, y Raad van Advies y CAFT a avisa cu e 6.1% cu Gobierno a aplica pa 2017 tambe mester wordo baha. Consecuentemente Raad van Advies y CAFT ta yega na un deficit mucho mas halto, 2%. CAFT a visa tambe cu den e nota di cambio mester bin mas medida ‘cover’ e 1.5% aki.

COORDINADOR
E cantidad di coordinadornan riba payrol oficial di e ministernan ta 325! Mike Eman so so tin 113 pa aña 2017, siendo cu Nel Oduber tabata tin 17 na 2009. Te dia di awe ningun hende no sa UNDA e 113 coordinadornan di Mike Eman ta, pasobra den Cococlishi no tin tanto luga pa nan tur, y tampoco ningun hende no sa KICO nan ta haci. Den e tabel adhunto bo ta mira un comparasion pa cada ministerio. e gasto di coordinadonan ta 32 miyon florin pa 2017!

GASTONAN DI BIAHAMENTO, HUUR, ABOGADO
Na gasto di biahamento nan ta gasta 1.7 miyon florin; na propaganda 3.3 miyon florin. E gastonan di propaganda a subi pa e aña di eleccion cu 11%! Nan gastonan di huur pa 2017 tin 23 miyon florin den presupuesto, ciendo cu aña pasa e tabata 21 miyon florin, un aumento di 6% principalmente debi cu mester cuminsa paga huur na MFA. No lubida cu e average di gasto di huur tempo di MEP tabata 17 miyon; kiermen nan a gana eleccion bisando cu nan ta bay elimina huur, pero nan a bay huur mas ainda. Na gastonan di abogado y conseheronan (coordinadornan cu no ta riba payrol pero tin nan propio NV), nan ta bay gasta 14 miyon florin na 2017.

Comments

comments