Lider di fraccion di MEP, Evelyn Wever-Croes, mescos cu su coleganan parlamentario, Andin Bikker y Marisol Lopez-Tromp, a pidi un audiencia cu Gobernador di Aruba, Su Excelencia Fredis Refunjol, pa asina mustr’e cu e Gobierno aki, no ta transparente, pa loke ta e documentonan di e acuerdo cu Citgo, mirando e hecho cu nan no por haya un copia pa por studi’e y tambe formula preguntanan cual nan lo bay haci na Gobierno. E supervision cu tin riba e documentonan aki, sigur ta algo cu a molestia e Parlamentario y su fraccion.
Por fin e documentonan, por lo menos e leynan a yega parlamento. E ley riba su mes ta uno simpel y no tin mucho pagina ni contenido. Cada articulo ta referi na un otro documento. Articulo 1 ta referi na un contract, articulo 2 na un otro contract. No mester ta un hurista y pa por aproba articulo 1, mester sa kico tin den contract number 1, y asina e ta bay. E forma con humiyante cu e Gobierno aki kier pone parlamentarionan traha bao di wowo di supervision di dos persona cu ta sinta eynan, ta pone sinti sumamente incomodo den bo trabao, ta algo cu no por acepta. E ta humiyante, ta un falta di respet, pero mas ainda ta un falta di transparencia grandi.
Ayera a entrega un carta di protesta cerca e presidente di Parlamento y a pidie pa reconsidera su posicion. Lamentablemente tabata custuma cu un presidente independiente y awo di biaha a bay pa un presidente demasiado dependiente. Sra. Wyatt Ras no por bisa nada pasobra awo Rene Herde ta manda den Parlamento awo. Loke e bisa ta bay. No loke sra. Wyatt Ras ta bisa. Ainda e ta purba di defende Gobierno y leu leu Herde ta bisa cu oposicion mester haya e documento. No ta cuestion di oposicion so, segun Wever-Croes.
Ayera den senioren convent a dicidi cu tur cuater a pidi documento y e tambe y ora cu presidente a pidi Gobierno, Gobierno a nenga. Ta spera cu Gobernador por interveni pa por haya e documentonan aki cu no solamente ta mara e Parlamentarionan cu ta bay tuma e decision pero ta bay para e futuro generacionnan di pais Aruba.
Pa menciona acerca, Wever-Croes a yega di traha den sector priva cu companianan grandi. E mes a traha cu companianan y refineria. Ora bo ta negosha loke ta confidencial, ta keda confidencial. E no ta bin den e contractonan cu ta na Parlamento. Valero sa con e ta negosha, Citgo sa con e ta negosha. Por ta Mike de Meza no tin e experiencia, pero e refinerianan si. Si nan sa algo den e documentonan cu ta confidencial, e ta un side letter of den un otro documento, segun Wever-Croes. Nan no ta den e documentonan na Parlamento.