Cabando aña 2016 mi kier enfoca riba mi deseonan pa e aña nobo. Aruba a conoce un crecemento economico grandi desde cu bos a bira pais den 1986. Y nos ta hopi orguyoso di esey.
Nos ta orguyoso tambe cu apesar cu nos pais a conoce un debe nacional, cu e gobiernonan prome cu 2009 a sa di mantene esaki dentro di e margennan internacional.
Sinembargo, den ultimo 7 aña nos a mira cambio den prioridadnan di e Gobierno cu a redobla nos Mega debe nacional, y cual a conduci cu nos a perde nos autonomia financiero.
E consecuencia di esaki ta e tantisimo medidanan cu Gobierno mester a introduci den e ultimo 7 añanan, cu a afecta nos economia.
Nos economia local a wordo seriamente afecta, y awor hasta ta stagna.
Comercio local a sufri bou di esakinan, y a conduci cu hopi tienda a cera y mama y tata di famia a perde trabou. Aki nos ta pensa riba e efecto di e parkeermeter y tram den Caya Betico Croes, pero tambe tur e belastingnan cu a wordo aumenta, entre otro e BBO cu awor ta mas halto cu na 2009.
E medidanan tabata tin nan efecto negativo tambe riba turismo. Turistanan no ta gastando mas manera antes. E turista awe ta gasta $100 menos cu un aña pasa.
Pesey ora e oportunidad a presenta pa re-apertura di e refineria, nos a sostene. Nos a lucha pa no desmantel’e y nos a lucha pa su reapertura. Nos a sostene e deal cu Citgo, maske cu nos a bisa cu nos ta hopi cauteloso y nos lo keda vigilante pa percura cu Citgo trece bienestar pa henter Aruba: empleo pa cuidadanonan di nos pais sin riesgonan financiero grandi.
Mi deseo pa 2017 ta pa nos cambia prioridadnan economico. Enbes di enfoca riba un solo pilar economico grandi, manera e pilar “green”, nos mester cu urgencia enfoca riba pilarnan mas chikito. Agricultura, cria y pesca. Servicionan financiero y huridico. Empresanan chikito cu sosten di un banco di desaroyo. Esakinan ta apenas algun di e solucionnan inclui den e plan y vision di partido MEP cu por crea desaroyo economico, cu por crea empleo pa mama y tata di famia y pa nos hobennan, pa asina crea progreso y bienestar real den cada hogar. Y ta solamente cu un economia creciente, nos por paga e Mega debe bek.
Nos kier pa cada cuidadano ta orguyoso bek di nos pais. Y nos ta determina y comprometi pa trece e cambio ey. Pa abo por sinti bo orguyoso un biaha mas di nos dushi pais Aruba. Si abo tambe deposita bo confiansa den nos man, nos por haci esaki un realidad. Cu aña 2017 trece tur lo miho pa bo y bo famia, y pa nos pais e cambio tan anhela.