AVP a bolbe faya nos pensionadonan. Den Parlamento Gobierno a trece padilanti cu pensionadonan den ultimo añanan a bay atras cu 248 florin pa luna. Awo gobierno di AVP kier duna nan 25 florin so di aumento pa luna pasobra supuestamente Aruba tin un MEGA DEBE.
MEP a prepara un amienda pa aumenta e pensioen di biehes cu loke nos pensionadonan a perde den ultimo añanan, 248 florin pero AVP a vota contra.
“Den mi bida mi no a mira hende asina hipocrita. Ora mester duna nos grandinan un alivio, nan ta bisa cu no tin placa. Ora mester duna Leoncita 10 mil florin pa luna extra, e ora si tin placa!
AVP a manipula y kier pa tur hende kere cu Aruba no tin un MEGA DEBE, pesey mi a keda sorprendi momento cu e Parlamentarionan di AVP a usa esey como motibo pa nenga nos grandinan un aumento di nan pensioen. Algo asina bo ta spera di nan, pero esun cu a decepciona mi mas ta Jennifer Arends-Reyes cu tambe a nenga nos grandinan e aumento di 248 florin, bisando cu Aruba tin un MEGA DEBE.
Ta duel mi cu ora nan mester privilegia nan grupito, nan ta lubida cu Aruba tin debe pero ora ta trata placa cu ta hopi necesario pa nos grandinan, e ora si nan kier bisa cu Aruba tin debe.
MEP tin un plan con pa fortifica e fondo di pensioen y mes momento baha e edad di pensioen, sin baha e suma di pensioen. Pa cuminsa MEP lo percura pa e 61 miyon florin cu Mike Eman a saca di fondo, bai bek den e fondo y asina hasi e fondo solido pa por baha e edad di pensioen. MEP lo percura tambe pa baha gasto di gobierno door di baha cantidad di minister, baha cantidad di coordinador y baha nan gasto di biahe y propaganda, y asina tin 50 miyon florin mas pa inverti den e fondo.
MEP lo no inverti den tram ni miyones den propaganda. E placa ey nos lo inverti den nos fondo di pensioen pa mehora calidad di bida di nos Pensionadonan.