Ya ta hopi aña cu tabata tin tiramento na Parlamento di Aruba pero ningun investigacion y resultado a sali di e caso aki pa cual aki lider di MEP, Evelyn Wever-Croes, a splica cu ta di lamenta cu nada a keda regla bao di husticia.
Tin cu para keto na e hecho cu den fin di siman tabata 27 di Augustus, cu ta marca un aña di e fecha cu Aruba a conoce Curatela Financiero. 27 di Augustus aña pasa, tabata tin reunion den Parlamento, den cual Parlamento su mayoria den fraccion di AVP, a regala Aruba su autonomia financiero den e ley di CAFT. Riba su mes, un momento doloroso, bergonsoso, debi na debe y debe cu Mike Eman y su Gabinete a crea, cu nos a perde nos autonomia financiero. Pero tambe ta un dia pa para keto, cu tabata tin hopi disturbio. Pafo di Parlamento tabata tin manifestacionnan. Den dia tabata basta pacifico, pero anochi a sali for di man. Tabata tin varios tiroteo. Segun miembro di Cuerpo Policial, tabata tin mas di 7 tiro cu a wordo lansa. Y te dia di awe Gobierno no kier duna claridad kico a pasa. Ministerio Publico tampoco.
Por corda con paden den sala, e Parlamentarionan a wordo teni rehen bao di presion y menasa pa vota na fabor di e ley aki, cu AVP a presenta pa entrega nos curatela financiero. Nan bida a wordo poni na peliger, na momento cu presidente di Parlamento, Marisol Lopez-Tromp, a permiti hendenan cu tabata para banda di gangnan, caminda cu ta drenta y sali sala, tabata menasa henter dia. Y despues cu minister Mike de Meza a laga su hendenan drenta via porta di cushina, tambe arma y menasando. A entrega keho, pero en vano, pasobra tin un ministerio publico cu no ta traha pa pueblo di Aruba, sino ora ta cumbini gobierno. A persigui tres pa cuater persona, pa motibo cu nan a kere cu nan a causa destruccion, casonan cu te awor aki ta compronde cu tabata inhusto y e crimen real cu a wordo haci e dia ey mes, a keda sin wordo investiga. Por corda tambe con presidente di Parlamento a laga verf e luga, a laga drecha tur cos pa kita tur prueba di kico tur a pasa. Sinembargo, MEP si sa kico a sosode. Si sa kende a tira e tironan ey y sa tambe cu ta di paden nan a wordo tira.
Nada ta keda scondi pa semper.
Otro aña Aruba lo mira un otro gobierno y lo mira husticia atrobe y un Ministerio Publico cu lo actua na bienestar di Aruba.
Un aña largo a perde e curatela financiero y no ta mira ningun solucion structural cu a wordo tuma riba finansas publico, pa decisionnan ad hoc so, cu Gobierno tabata tuma. A entrega nos autonomia financiero, a acepta e curatela y no a haya nada, cu por bisa cu ta beneficia e pais aki. Pero dia 27 di Augustus a drenta historia di pais Aruba como un dia sumamente scur. E dia cu inhusticia a prevalece y e dia cu Aruba a perde su autonomia financiero.