E representante di Hulanda na Eurovision, Joost Klein, tabata obheto di un investigacion di parti di European Broadcasting Union (EBU), despues cu por a scucha cu a puntra e concursante Israeli riba su participacion den Eurovision.
Cancion di Eurovision
“Actualmente nos ta investigando un incidente cu a wordo reporta y cu ta involucra e artista Hulandes. E no lo participa den e ensayonan te cu proximo aviso. Nos no tin mas comentario n’e momentonan aki y nos lo update na su debido momento,” un vocero di EBU a bisa den un comunicado diabierna.
Esaki a sosode despues cu Klein a wordo scucha ta pone presion riba Eden Golan p’e por a responde un pregunta durante un conferencia di prensa diahuebs, realisa pa un periodista Polaco.
El a puntra Golan si ta kere cu e tabata causando un riesgo di siguridad p’e otro participantenan door di asisti n’e evento memey di e “guera genocida” di Tel Aviv na Gaza.
E presentado Sueco, Jovan Radomir, a interveni rapidamente, bisando cu Golan no mester responde n’e pregunta. Klein a responde den bos halto: “Pakico no?”
Klein tabatin programa pa train diabierna net prome cu Golan, sinembargo, a wordo impedi p’e organisadonan.
Riba e punto aki no ta cla, si e lo presenta den e gran final di diasabra.
Varios video a surgi riba red social despues di e ensayo general diaranson cu a mustra e cantante Israeli ta wordo geboe pasobra su pais, acusa di genocidio na Gaza, a wordo permiti pa participa.
Prome cu e di dos semifinal cu a tuma luga diahuebs, miles di manifestante pro-Palestina, a sali riba caya den e ciudad Sueco di Malmo den protesta p’e participacion Israeli den e concurso.
Ta spera mas protesta organisa pa grupo pro-Palestino den e cuidad anfitrion dia 11 di mei, esta awe, despues cu Israel a clasifica como un di e 26 paisnan cu lo competi na final di e aña aki.
Den solidaridad cu e Palestinonan na Gaza y como parti di e protestanan, a tuma luga un evento musical alternativo, Falastinvision, e ultiom dia di e Festival di Eurovision.
Hopi artista di Suecia y otro parti di Europa lo participa pa demostra nan apoyo na Palestina.
Autoridad a adopta medida di siguridad adicional, incluyendo polis cu metrailleur y refuerso di Dinamarca y Noruega.
MIENTRASTANTO E TA DESCUALIFICA
Mientrastanto a descualifica Hulanda p’e final di Eurovision, cu lo tuma luga awe tardi, segun EBU. E artista Klein ta wordo investiga pa Polis Sueco c a ricibi “un denuncia presenta pa un miembro di e ekipo di produccion despues di un incidente despues di su actuacion den e semifinal diahuebs anochi.” Por lo tanto, e organisadonan a considera inapropia permiti Klein sigui participa den e evento mientras cu tin un proceso legal den su contra.
“Nos ta mantene un maneho di cero tolerancia p’e comportacion inapropia den nos evento y nos ta compromete nos mes na proporciona un ambiente di trabao sigur pa henter e personal di e concurso. Den bista di esaki, e comportacion di Joost Klein na un miembro di e ekipo ta wordo considera un violacion di e nomranan di e concurso,” EB a splica.
E incidente cu e representante di Hulanda “no a involucra ningun otro artista of miembro di delegacion,” e entidad a aclaria, desmintiendo tambe “algun reportahe mediatico y speculacion riba red social.”
E cadena di television Hulandes Avrotros, responsabel p’e delegacion di Hulanda na Eurovision 2024, ta considera e descualificacion “desproporciona” y a declara cu e decision a laga nan den ‘shock.” “Nos ta lamenta profundamente y nos lo bolbe n’esaki mas despues,” nan a skirbi den un comunicado.
No ta conoci den ki exactamente e incidente cu Klein a consisti, pero e cadena Sueco SVT a reporta cu a trata aki di un confrontacion fisico entre e artista Hulandes y un fotografo femenino.
