DEN HAAG, Hulanda- Rob Wainwright, director di Europol, ta teme cu dialuna na momento cu hopi empresa cende nan computernan, tin chance cu un biaha mas lo tin un atake cibernetico na nivel mundial, unda cu mas computer lo wordo infecta cu e Ransomware. Esaki segun su declaracionnan haci na e canal di television Ingles ITV.
Segun e prome cifranan di Europol, desde diabierna, ora cu e atake a cuminsa, sigur un 200 mil computer den 150 diferente pais a wordo infecta cu e virus. Segun Wainwright casi niun hende no a paga e suma di “rescate” pidi door di e hackernan y hopi di sistema di companianan a wordo infecta.
E virus, segun Wainwright, a propaga su mes asina lihe door cu e programa ta un combinacion raro di un ransomware y un virus “normal”. El a bisa cu e cantidad di computernan afecta un biaha mas ta subi. “Mi ta preocupa pa personanan cu ta bay nan trabao mañan y lo haya nan mes cu computernan cu no ta proteha optimalmente. Esaki lo por conduci na e mesun scenario di diabierna ultimo”, segun Wainwright.
Fuente: www.detelegraaf.nl