Bureau Europese Unie en Koninkrijksrelaties kier haci un yamada na tur fotografonan na Aruba, amateur y profesional, pa participa na e ‘’OCTA Innovation Photo Competition 2016”.
OCTA (Association of the Overseas Countries and Territories of the European Union) ta e asociacion encarga cu ta ofrece ayudo tecnico na tur pais/isla cu ta pertenece na Union Europeo pero cu ta situa pafo di e area geografico Europeo.
Por lo tanto tur e 22 islanan (OCT’s- Overseas Countries & Territories), Anguilla, Bermuda, Boneiro, British Virgin Islands, Cayman, Corsou, Falkland Islands, French Polynesia, Greenland, Montserrat, New Caledonia, Pitcairn, Saba, Saint Berthelemy, St Helena, St. Pierre & Miquelon, Sint Eustatius, St. Maarten, Turks & Caicos y Wallis & Fortuna, incluyendo Aruba como parti di Reino Hulandes, ta miembro di e asociacion.
Na 2015 OCTA a lansa un proyecto ‘OCTA Innovation’cu ta inclui un website www.octa-innovation.eu como plataforma digital pa duna informacion tocante tur desaroyo innovativo di e 22 islanan. OCTA ta encarga cu identifica proyecto y oportunidadnan innovativo na e pais-/islanan aki cu ta yuda diversifica nan economia y desaroyo sostenibel.
OCTA awor ta lansa un competencia pa tur fotografo (amateur of profesional) di e 22 islanan pa participa den e competencia unda bo ta saca bo miho potretnan captando innovacion y creatividad di bo pais.
E participante tin pa manda potret cu ta mustra con desaroyonan inovativo ta cambiando e economia, bida diario, y ta treciendo un cambio di tradicional/contemporario pa un bida mas moderno na su pais.
Cada participante mester manda nan potretnan na [email protected] durante e luna di September 2016 y e ganador lo recibi un certificado, y lo publica tur su potretnan riba e website di OCTA y tambe exhibi nan na Brussel cu lo yega na un audiencia internacional.
Aruba sea innovativo y ban participa mustrando e beyesa di Aruba su desaroyonan innovativo.
Pa mas informacion y pa por haya e condicionan pa por participa por tuma contacto cu Bureau Europese Unie en Koninkrijksrelaties na 582-3190 of 582-3177.