CARACAS/MADRID- Esteban GonzAlez Pons, vocero di e Partido Popular den Parlamento Europeo, a denuncia cu su persona hunto cu otro eurodiputadonan a wordo deporta di Venezuela, despues di nan yegada na Aeropuerto Internacional de Maiquetía.
“Atencion. Nan a kita nos paspoort for di nos y a expulsa nos di Venezuela. Nan ta tratando nos malo y e unico splicacion cu nan ta dunanos ta cu Maduro no kier nos akinan”, el a bisa ariab su cuenta di Twitter.
E funcionario cu tabata hunto cu e eurodiputadonan tabata Gabriel Mato Adover, Esther de Lange, Paulo Rangel, Jose Ignacio Salafranca Sanchez-Neyra y Juan Salafranca.
E funcionarionan a yega e pais pa reuni cu Juan Guaido, kende a huramenta como presidente interino di Venezuela.
“Nos tabata e prome delegacion internacional invita pa presidente Juan Guaido. Awe nan a saca nos afo, pero pronto nos lo bolbe bek na un Venezuela liber”, Pons a bisa.
Algun hora prome cu su yegada, Gonzalez Pons a publica ariba su cuenta di Twitter cu e tabata consciente cu nan lo por wordo deporta. “Nos ta consciente di cu nos por wordo mal ricibi pa esunnan cu no ta desea pa Europa wak loke ta pasando na Venezuela, p’esey si nos ta posibel, nos lo conta boso mas laat con cos ta y si nan ta laganos traha”.
Manera cu nan a aterisa, Gonzales Pons a informa di esaki. “Durante e escala na Santo Domingo e emabadora di Union Europeo y Spaña a informanos di cu nos lo wordo expulsa of deteni”.
Efectivamente, nan a wordo deteni y expulsa, na cual el a bisa cu “nos ta eurodiputadonan y nos tin un invitacion oficial di e Asamblea, si nos wordo deteni of expulsa, esaki ta e demostracion definitivo di cu akinan ya caba tur porta a wordo cera y Union Europeo mester retira su mes inmediatamente for di e grupo di contacto. Spaña tambe.
Despues di nan expulsion, e eurodiputadonan a subi un avion di e aerolinea Ibera cu destinacion Madrid, Spaña.