Diadomingo proximo, dia 11 di november, 5 Arubiano lo landa for di Venezuela (Puerto Escondido) pa Aruba. Esaki lo ta un ripiticion di e hazaña di Roly Bisslik 30 aña pasa. Meta di e hazaña aki ta pa colecta fondonan pa Wilhelmina Kanker Fonds, pa cual nan a dun’e hazaña e nomber “Crossing 4 Hope”.
Invitacion ta bay na tur esunnan cu kier compaña e landadonan, pa asina hunto apoya e grupo aki, den forma masal.
Pero, por fabor tene bon na cuenta cu no por obstaculisa e landadonan den ningun forma. E botonan lo mester core pabao di nan y no pariba di nan. Tambe mester tene un distancia basta grandi pa e presion di motor no stroba nan y tampoco e holo di motor.
Un di e personanan cu ta compaña e landadonan ta Sr. Anthony Hill. E lo topa cu nan algun miya pafo di Aruba. Es decir cu e lo no sali cu nan for di Venezuela.
Pero tur esunnan cu kier bay of sali di Venezuela cu e grupo, e ora lo mester ‘klaar uit’ na Barcadera.
E landadonan lo sali di Venezuela den careda di 6 or di mainta y segun calculonan, nan lo landa den mas o menos 8 ora.
E radio emisora Top 95 FM lo transmiti e hazaña aki, dus por sigui nan pa haya mas informacion di con leu e landadonan ta for di Aruba.
Asina ta, ban join e hazaña aki diadomingo awo, pero tambe “Ban mantene nos lama y beachnan limpi”