Sigur un orador cu a wordo spera hopi riba dje den e conferencia di World Tourism Organization tabata e Arubiano dr. Tico Croes, kende ta wordo considera un experto entre otro riba tereno di turismo. Dr. Tico Croes despues di a retira di politica na Aruba, a establece su mes na Florida, unda cu e ta trahando na e prestigioso University of Central Florida. Mirando su posicion y experencia, ATA a acerca su persona pa haci un estudio riba e tema di felicidad y su co-relacion cu turismo. El a splica cu esaki ta un serie di investigacion cu su team a bin ta haciendo desde 2011 hunto cu UCF y ATA riba e plan di turismo. Den combersacion cu gran cantidad di hende, a sinti cu a yega momento pa cuminsa cambia e forma con ta midi turismo. Pues no solamente a base di cantidad di hendenan cu ta bin, e cantidad di placa cu nan ta gasta, e REVPAR, pero tambe e impacto turistico riba hende na Aruba. Asina a bini cu un rapport cu a hiba e titulo “Winning the Future” unda a propone un forma di midi nobo cu ta “Happiness”. Na 2013 e ripiti e mesun encuesta y awor riba invitacion di ATA e team a bolbe ripiti esaki. Durante e ultimo 6 añanan a realisa mas di 2000 encuesta cu ta trata e topico di Felicidad. Loke a constata ta cu tin un stabilidad grandi riba e tema di Felicidad na Aruba. Por ehempel, segun dr. Croes, 78 porciento di e hendenan na Aruba ta bisa cu nan ta feliz cu parti naturalesa, 76% ta bisa cu nan ta satisfecho cu nan bida y mas di 80 porciento ta bisa cu nan tin un bida di balor. “Si pone e cifranan aki den contexto mundial basa riba e rapport reciente di Nacionnan Uni di “World Happiness Report”, nos por mira cu e nivel di Felicidad na Aruba ta similar na e nivel di mas halto rond mundo cu ta wordo manifesta na paisnan manera Suisa, Dinamarca, etc. Un porcentahe halto di hendenan local cu ta sinti nan mes feliz. Y esaki ta importante pasobra Felicidad ta un concepto importante no solamente pa desaroyo di un pais pero tambe pa un desaroyo individual.” Profesor Croes a sigui splica cu investigacionnan cu nan y otronan a haci a demostra cu hendenan feliz ta esnan mas saludabel, ta esnan mas productivo, creativo. Pues tin un motibo particular pakico ta enfoca asina hopi pa mira e relacion di turismo cu felicidad y con esaki ta afecta e poblacion local. Henter e investigacion tabata concentra riba Aruba. A colecta informacion di 465 den e survey aki rond Aruba, basa riba e Censo di 2010 na Aruba. Y e resultado ta hopi bon y ta mustra di con Aruba ta asina exitoso. E slogan di “One Happy Island” ta wordo carga door di e poblacion y ta sostenibel pa future tambe.