Estrella Campeon Copa Don Elias Mansur 2016

Diadomingo anochi den un Centro Deportivo Guillermo Prospero Trinidad bon bishita, Estrella y Riverplate ta empata na dos, despues cu Estrella a pica dilanti tempran 2-0. Despues di e tempo completo a bay over na penalties, aki nan a bay otro fuerte bataya prome cu arkero Carlos Geerman a para dos penalty pa Estrella gana Riverplate 6-5. Riverplate a yega final eliminando Dakota cu score 2-1 diabierna anochi. Estrella a yega final derotando RCA 2-1 den semifinal diasabra anochi. Durante e half time di e gran final, directiva di RCA a duna reconocimiento na shete baluarte Arubiano cu a milita na 1962 den e seleccion Antiano cu a bira Campeon na Jamaica durante e Campeonato Centro Americano y del Caribe venciendo nada menos cu seleccion Mexico den final. Jubi Richardson, Dodo Franken, Candi Wernet, Edwin Dirksz, Boei Briezen, Benny Geerman y Dama Werleman ta esnan cu a ricibi plakaat/escudo tricolor como un bunita recuerdo di nan logro 54 aña despues. Lionel Croes y Johnny Winterdaal a tuma e plakkaat pa Dodo Franken y Dama Werleman cu no por tabata presente. Directiva di RCA ta gradeci comision dames y comision organisador, prensa completo y tambe na e refereenan, ekiponan cu a participa y e mas di 2500 fanatico cu a paga nan entrada y contribui na bar y cushina. Por ultimo kier gradeci e motor Serge Mansur pa su grandioso contribucion y na Rachelle de Cuba otro nieta di Don Elias Mansur kende a haci entrega di trofeonan na Riverplate y Estrella. Di biaha kier participa cu Campeon di Aruba su division honor RCA “Big Wheel Lottery powered by Powerade” ta bay topa Campeon di Sint Maarten diasabra 17 di September den CDGPT. Un boca bisa otro pa nos yena stadion cu e dushi ambiente tricolor.

Comments

comments