ROMA (AP) — Un estampida den un concierto di un rapero den un club nocturno yen yen di hende. Esaki a tuma luga den e localidad di e costa adriatico, den e centro di Italia, caminda cu 5 hoben y un muhe a muri diasabra marduga, segun polis a informa. Tambe tabata tin 59 hende herida.
Un video graba pafo di e sala di concierto di Corinaldo, cerca di Ancona y emiti pa TV RaiNews25, ta mustra un grupo di adolescente cu ta core sali for di e porta di e discoteca y a yega cerca di un muraya of barera cerca di e salida. Esaki a basha abao door di e presion y un cascada di hoben a cay hunto cun’e, un ariba otro.
E hecho di cu “dos muraya a cede door di e impacto di e hobennan cu tabata saliendo” por a causa e tragedia, segun e minister Italiano di Interior, Matteo Salvini, a declara na RAI.
E curpa di e personanan, victima di e stampeda a wordo haya cerca di un muraya cerca di e salida di e luga. Ta sospecha cu e luga lo a excede su capacidad maximo.
“Desde e investigacion inicial por a verifica cu a bende mas entrada di loke e luga por a carga”, segun e coronel Cristian Corraza, comandante di polis paramilitar di e provincia di Ancona, segun citacion pa e agencia di noticia Italiano ANSA.
Segun radio estatal, den e interior di e club nocturno tabata tin mas di mil persona na momento di e stampede.
E adolescentenan fayeci tabata tin entre 14 cu 16 aña di edad y e muhe tabata tin 39, segun Corrazza, agregando cu di e heridonan, 13 di nan tabata di gravedad.
Segun informenan, mayoria di e fayecidonan a sufri fracturanan di craneo.
Medionan Italiano a bisa cu e muhe a compaña su yiu pa e discoteca Lanterna Azzurra pa wak e actuacion di e rapper Sfera Ebbasta, cu ta hopi popular entre e hobennan,
Den un informacion anterior, ANSA a bisa di cu un hende lo a spray algo irritante y cu esaki a provoca e escenanan di panico. Salvini, di su banda, a declara cu tabata tin un holor desagradabel di algo cu por tabata amonia of otro sustancia.
Algun sobreviviente cita pa medionan Italiano a bisa cu al menos un di e salidanan di emergencia tabata blokia ora cu e publico a purba sali, pero e minister a indica cu e investigacion inicial “parce di ta descarta e posibilidad ey”.
Ora rescatistanan a yega, tur e portanan di e local tabata habri, y cu tampoco tabata tin confirmacion inmediato di e uzo di un spray iritante.
Bomberonan a concentra den duna prome auxilio na sobrevivientenan, benta ariba caya pafo di e discoteca, prome cu cuminsa cu e investigacion, el a bisa.