NEW YORK, Merca- E estado di New York a prohibi e apelacion na excepcionnan no medico, incluso religioso, pa esunnan cu ta pretende di evita e muchanan na scol, mei mei di un lucha contra di un brote di sarampi na Merca, segun e gobernador di e entidad aki, Andrew Cuomo.
“Ciencia ta masha cla: vacuna ta sigur, eficaz y e miho manera di mantene e muchanan sigur. E administracion a tuma varios medida agresivo pa contene e brote di sarampi, pero, door di e aumento, tin mester di medidanan adicional ap pone fin na e crisis di salud publico”, e texto ta bisa.
Mas aleu, e gobernador a bisa cu e ta respeta e libertad di religion, pero a enfatisa cu e proteccion di salud publico tin prioridad awo. “Door di promulga e medida como ley, nos lo yuda na preveni mas transmision di e malesa y pone un stop na e brote”, el a agrega.
E aña aki Merca ta enfrenta un rebrote di e infeccion viral aki. Dia 30 di mei e Center for Disease Control and Prevention a informa cu e cantidad di casonan di sarampi den e pais a subi na 971 den transcurso di e aña aki. Ta prome biaha cu den e ultimo 25 añanan cu den teritorio Mericano ta registra un cantidad asina halto di personanan contagia. Na 1994 a detecta 963 caso.
Specialistanan ta kere cu e resurgimento di sarampi ta relaciona cu e movimento contra di vacunacion y difusion di informacion falso ariba internet riba e posibel efectonan di e vacuna.
Datonan global preliminar ta mustra cu de casonan registra a aumenta cu 300% den e prome tres lunanan di 2019, compara cu e mesun periodo di 2018, e Organisacion Mundial di Salud (OMS) a informa na april.
Según e organismo, e resurgimento a keda registra tambe den algun pais di Europa, Republica Democratico di Congo, Madagascar, Filipinas y otro nacionnan, causando un gran cantidad di mortonan, principalmente entre muchanan chikito.