Tin sigur 15 morto caba te cu awe mainta a causa di e inundacionnan cu a tuma luga na Venezuela. E situacion a exigi cu presidente di e pais Nicolas Maduro mester a declara estado di emergencia. E cantidad di mortonan aki tabata den estado di Merida. Bou di e victimanan tin tambe dos mucha.
Mayoria di e mortonan tabata den estado Tovar, unda cu un riu a pasa over y a inunda e caya principal. Videonan riba rednan social por mira con e awa tabata lastra autonan. E camindanan no ta habri a consecuencia di movecion di tera.
Diamars anochi Presidente Nicolas Maduro a anuncia cu al menos 85 di e 335 municipionan ta afecta pa e yobida torencial cu ta suta e pais e ultimo simannan. Un di esnan mas perhudica ta e estado andino Merida, unda tin 15 morto a consecuencia di e inundacionnan pisa.
Maduro a decreta situacion di emergencia den estado Merida, unda cu banda di e 15 fayecidonan tin seis persona disparce.
Den e bario Tovar na Merida, cu tin 38.469 habitante, for di dialuna tin yobida pisa. Tin areanan sin coriente y / of problema di comunicacion telefonico.
Segun Maduro, al menos 8098 cas ta destrui door di inundacion, 35.646 person afecta, 10 brug a sufri daño den e 11 estadonan mas afecta. Di e 23 regionnan den cual e pais ta dividi, e estadonan as afecta ta Amazonas, Apure, Aragua, Barinas, Bolívar, Delta Amacuro, Mérida Monagas, Táchira y Zulia, ademas di algun zona di e capital Venezolano.