Gobierno ta sigui cu reunionnan e siman aki hunto cu expertonan riba e tereno aki pa defini e temporada cu lo implementa e diferente cambionan pa yega na e Reforma Fiscal. IMF ya caba a manda su rapport den concepto pa Gobierno duna su comentario lo cual a pasa tambe. Y awo ta sperando e rapport final aki. E rapport di IMF ta contente sugerencia y recomendacionnan hopi valioso pa nos yega na e Reforma Fiscal.
Den e ‘Masterklas’ di Raad van Advies durante siman rib’e tereno aki hunto cu varios representante di gremionan na Aruba, a tene ‘brainstorm sessions’. E resultadonan di e ‘brainstorm sessions’ aki, Minister di Finansa y Minister President a inclui den e reunionnan tocante Reforma Fiscal y lo tene cuenta cu e sugerencianan haci di parti di Raad van Advies tambe.
Den e reunion pa trata e Reforma Fiscal hunto cu Prome Minister y Minister di Finansa, a participa representantenan di Departemento di Impuesto, Departamento di Asunto Economico, Departamento di Estadistica, Departamento di Finansa, y e Gremionan Camara di Comercio, Atia, y Asociacion di Fiscalistanan di Aruba. Tur a trece nan pensamentonan dilanti locual ta necesario pa Gobierno fiha un rumbo.
Unabes cu Gobierno ricibi e rapport di IMF, lo bolbe sinta cu tur Gremio pa delibera pa presenta e sugerencianan y pa hunto yega na desicionnan di loke lo wordo implementa y ki tempo esaki lo pasa.
Prome Minister Evelyn Wever-Croes a expresa di tin tur fe y confiansa cu Gobierno di Aruba ta logra un sistema di impuesto husto y mas senciyo cu ta trece alivio pa e comunidad di Aruba.