Willemstad – Durante un seremonia militar riba Djabièrnè 28 di Febrüari 2025, den oranan di mainta, Eskuadron rotashon 47 a pasa su tareanan pa e siguiente unidat, rotashon 48. E Komandante nobo, Teniente Kolonèl Kjell prosedente di Schaarsbergen, a tuma e komando di su predesesor, Mayor Jan, durante e tradishonal traspaso di rema.
Despues di kuater luna intensivo den Region di Karibe, Mayor Jan ta wak bèk ku orguyo riba e koperashon i entrenamentu di e eskuadron Delta “DJOKJA”. “Tabata un oportunidat úniko pa trein ku nos unidat di arma pisá den e klima tropikal aki i pa traha huntu ku CZMCARIB i partnernan lokal. Nos a siña hopi tokante kon operá den e kondishonnan desafiante di Karibe i kon pa adaptá den un ambiente nobo.”
Un punto kulminante di e periodo aki tabata e ehersisio Karibense DJOKJA. Durante e ehersisio aki tur e abilidatnan di e eskuadron a bini huntu den e ambiente spesial di Karibe. Ehekutando maniobranan tur kaminda riba e isla, e sosten i integrashon di inovashonnan tékniko, i e retonan di Kòrsou su klima i tereno a hasié un eksperensia sumamente balioso. Mayor Jan a enfatisá e balor di koperashon den region. “Ta bisto ku nos no por ehekutá nos tareanan nos so. E sosten i koperashon ku militarnan di Kòrsou i partnernan di seguridat lokal ta di balor inkalkulabel. E sosten di e poblashon tambe tabata di gran importansia. Mi ta hopi agradesido pa e espasio ku nos a haña pa realisá nos entrenamentu. Tabata spesial pa mira kon, apesar di diferensianan den antesedente i métodonan di trabou, nos por a kontribuí konhuntamente na seguridat i stabilidat. E periodo aki no solamente a fortifiká nos kapasidatnan operashonal, pero tambe e lasonan ku nos partnernan den Karibe.”
Teniente Kolonèl Kjell ta antisipá pa trein i traha huntu ku Eskuadron 11 di Ingeniero den Karibe a lo largu di e siguiente kuater lunanan. “E eskuadron ta proveé sosten di kombate di ingenieria na e Brigada Aéreo Mobil. E ta hasi esaki na bienestar di Hulanda mundialmente, bou di tur sirkunstansia, for di laira y riba tera. Dentro di e Barètnan Kòrá, e unidat ta un eksperto den kondishonamentu di tereno i spesialisá den kontrol i uso di eksplosivo. Normalmente e eskuadron ta proveé un grupo di ingeniero pa rotashon na un eskuadron di infanteria. Awor e lo tin e oportunidat pa realisá tareanan den Karibe komo unidat. Esaki ta spesial i un oportunidat úniko pa e eskuadron. Na promé lugá, pasobra nos ta trese kapasidatnan i rekursonan úniko ku por ta di gran balor si nos yudansa òf asistensia wòrdu pidí den e region. Na di dos lugá, e ta un oportunidat úniko pa nos trein i eksperimentá den e klima tropikal di Karibe. Mi ta antisipá ku nos ta bai tin un periodo hopi interesante, i mi ta spera ku nos por hasié un tempu bunita i signifikante huntu ku nos partnernan lokal.”
Ehérsito Real Hulandes tin un eskuadron permanente den Karibe. E unidat aki, komandá pa CZMCARIB, por keda desplegá pa un variedat di tarea. Durante e kuater lunanan benidero e eskuadron lo trein na Aruba, Boneiru i a la bes na Kòrsou.
