LONDON, Inglatera – Mas di 1000 deportista, incluyendo cuater medayista di e weganan Olimpico di invierno di Sochi 2014 y cinco di London 2012, ta envolvi den practicanan di dopahe encubri pa oficialnan Ruso di e Ministerio di Deporte, profesor Richard McLaren a revela diabierna na London.
Ora di presenta e publicacion di e di dos parti di su informe, den un hotel di e capital Britanico, e catedratico Canades a sigura cu Rusia “a actua deliberadamente y a diseña un conspiracion institucional den deporte di verano y di invierno.”
“Nos por confirma loke nos a anuncia den e prome informe: a existi un encubrimento cu a cuminsa na 2011 y cu a keda manteni te despues di e Weganan Olimpico di invierno di Sochi (2014). Un encubrimento cu a evoluciona te na nivelnan sin precedente,” el a sigura.
“E conspiracion institucional aki a existi entre deportistanan, semper den colaboracion cu oficialnan Ruso di e ministerio di Deporte y cu apoyo di e Agencia Antidopahe Ruso (RUSADA), CSP (Centro di Entrenamento di Ekiponan Nacional Ruso) y laboratorio di Moscu pa manipula controlnan di dopahe. E deportistanan aki no a actua nan so, sino dentro di un infrastructura,” el a splica.
E informe, encarga na McLaren pa e Agencia Mundial Antidopahe (AMA), a envolvi cuater medayista Olimpico den e Weganan di Sochi 2014 y cinco di London 2012, den un “encubrimento cu a evoluciona te na e nivelnan insospecha.”
“Tabata tin un encubrimento cu a evoluciona den un strategia institucional y disciplina pa gana medaya,” McLaren a señala, kende a bisa cu e sistema aki a pone den practica den e Weganan di London, e Mundialnan di Atletismo di 2013 na Moscu y den e Weganan di Invierno di Sochi.
Rusia a gana 72 medaya cuater aña pasa durante e Weganan di London, 21 di nan di oro y 33 medaya na Sochi, 13 di oro.
“E deseo di gana medaya a suplanta e moral colectivo, e etica y balornan di wega limpi,” McLaren a subraya.
“Ta imposibel sa te cuanto tempo lo remonta e conspiracion aki y cuanto hende ta envolvi. Durante varios aña, e competencianan internacional a wordo manipula pa e Rusonan. Entrenado y deportistanan a competi den condicionnan desigual. E amantenan di deporte tin e derecho oa sinti nan mes decepciona,” el a indica.
Fuente: NTN24