Un erupcion volcanico a cuminsa diahuebs mainta riba e peninsula di Reykjanes, zuidwest di Islandia, segun e Agencia Meteorologico di e pais a informa. Potret y video publica riba e rednan social ta mustra lava saliendo door di un scheur, iluminando un columna di huma.
A registra panort di e localidad di Grindavik, den e mesun zona caminda cu a produci evento similar dia 18 di december y 14 di januari. Actualmente e ciudad ta desocupa y e autoridadnan ta evalua si e ta core peliger pa sufri daño.
“E actividad sismico intenso a cuminsa pa 5’or y mey di awe mainta noordoost di e sero Syllingarfell. Aproximadamente 30 minuut despues, e erupcion volcanico a cuminsa n’e luga,” segun e informe.
E prome indicacionnan ta calcula e largura di e scheur di por lo menos di tres kilometer. E fuentenan di lava ta alcansa entre 50 y 80 meter di haltura, mientras cu e columna volcanico ta yega cerca di tres kilometer, segun e agencia.
Ta trata di e di seis erupcion riba e peninsula di Reykjanes den e ultimo cinco añanan y e di tres den e ultimo tres lunanan. Anteriormente, na januari, un potente erupcion volcanico a tuma luga panort di e mesun ciudad, di cual e habitantenan a wordo evacua cu anticipacion. Den poco ora, e lava a alcansa algun cas, provocando candela.
