Dia 8 di Maart ultimo, 800 muhe di Aruba a acudi na Renaissance Convention Center pa scucha oradornan internacional como tambe local. Dos orador cu sigur ta contento cu na final a dicidi di participa tabata Erin Croes di Magic FM y Enrita Werleman di Stichting BOB pa saminacion di cancer di pecho.
Erin Croes ta expresa cu e conferencia tabata fenomenal. “E forum cu nos a haya. E oportunidad pa expresa nos mes. E plataforma cu Minister Hooyboer-Winklaar a pone pa cada un di esunnan cu a papia tabata increibel.”
“For di e momento cu e la solicita mi persona pa presenta. E di cumi Erin gewoon papia di bo mes. Bo storia. Bo mesun storia personal,” e presentadora y doño di Magic FM ta bisa.
E ta sigui splica cu na prome instante ora cu Minister a pidi’e pa haci’e e la busca excuus pa sali for di dje… “y mi a bis’e, sorry minister mi ta bezig pero e a haci’e manera un tipo di joke bisando mi cu e tin un award winning actress. E tin un prinses riba stage y e mester un Queen.”
“E tabata un experiencia hopi humilde unda cu bo por habri bo curason pa hendenan. Loke bo ta mira ta un radio. Bo ta wak felicidad, alegria pero tabata tin e barancanan cu bo mester a bula. Mi a conta durante e conferencia cu mi a haya un baño di awa friu tempo mi ta tabata tin 17 aña. For di chikito mi tabata gusta radio y mi mayornan no tabata kier pa mi sigui den esey,” e comerciante ta bisa.
E ta sigui amplia bisando cu mas ainda ora bo dicidi di bay haci loke bo kier. Haci loke ta bo pasion anto un persona grandi ta bisabo bo no tin stem pa radio. Bo no por haci e cos aki. E ta kibrabo. Mi mensahe ta sigur pa kere den bo mes pasobra ‘they might be surprised by you’… “y esey ta loke mi a comparti. Hopi cosnan personal a bin dilanti. Cosnan di mi bida. Cosnan cu mi a pasa aden y mi no a laga nan strobami di logra e meta cu mi tabata desea.”
Enrita Werleman investigado di stichting BOB pa chekeo di cancer di pecho Aruba ta bisa cu su charla a bay super bon. “Minister Hooyboer-Winklaar a pidi nos pa pone nos foyetonan y ami mesora a puntre pakico no haci un charla. Nos a haya introduccion di Minister Hooyboer y mi a puntre mesora pakico no haci un charla cortico.”
“Nos ta un aña mas leu di dia cu e fundacion a cuminsa y mi kier a haci un relato un tiki mas profundo di loke e foyeto ta bisa. Mi a haya oportunidad di dirigi mi mes 10 minuut na publico na unda cu mi a pone enfasis cu nos hende muhenan mester ta mas ‘in charge’ di nos salud. “Nos ta cambia hopi cosnan den nos bida pero nos no ta traha riba e parti di nos mesun curpa,” Enrita ta amplia.
E ta sigui bisa cu hende muhe mester realisa cu su salud ta necesario pa por sigui padilanti. Hende muhe cu ta malo ta causa cu su circunstancianan bon tambe ta sufri di dje. “Nan casa, doñonan di trabao, etc. Bo mes mester traha riba e cambio y esey tabata facultad.”
Enrita ta sigui bisando cu tambe a conta cu BOB tin un aña ta traha riba e programa di screening pa cancer di pecho pa tur hende muhe haci cada dos aña… “y nos ta contento cu e acogida. E por ta mas pero e ta e prome aña y nos ta satisfecho.”
Den su salida BOB a detecta varios casonan cu ya caba ta hayando tratamento… “y nos ta hopi contento cu esey. E siguimento ta hopi importante. Mi tin sigur cu e charla cu mi a duna a yega na hopi hende y a lanta nan un tiki for di soño pone nan pensa mas leu cu ta importante pa bo haci control. Abo ta doño di bo curpa. Abo ta sinti e cambionan cu tin y por avisa bo dokter si abo no haci’e ningun hende ta haci’e p’abo.”