ANKARA, Turkia – Cu citanan electoral na porta di ambos pais, e crisis diplomatico habri entre Turkia y Hulanda, a rais di e prohibicion di campañanan electoral riba teritorio Hulandes di dos minister Turco, no tin bista di un solucion pronto. Al contrario, husga pa e retorica inflama uza, autoridadnan Turco parce ta interesa pa mantene e tension al maximo (manera cu tambe a sosode cu incidentenan anterior na Alemania, Austria y Suisa) di cara pa e referendum cu dia 16 di April proximo mester dicidi si e pais Euroasiatico ta converti den republica presidencialista.
For di eynan, hefe di e estado Turco, Recep Tayyip Erdogan, a acusa diadomingo un biaha mas autoridadnan Hulandes di comporta di manera “fascista y nazi,” a adverti nan cu nan lo “paga caro” e incidente y a pidi organisacionnan internacional na impone “sancionnan” riba Hulanda. E medidanan tuma te awor aki – ta pa nenga entrada na e embahador Hulandes y no bin bek Turkia y blokia e acceso na legacionnan diplomatico Hulandes riba teritorio Turco – lo uni mas, e mandatario Islamista a priminti: “Ainda nos no a cuminsa (na tuma represalia).”
Durante e atardi, den un discurso dilanti su siguidonan den e localidad di Kocaeli, el a busca ademas den lanta animo di e comunidadnan Turco na Europa: “Mi ta dirigi na nos ciudadanonan pafo di e pais. Boso sa loke boso tin cu haci contra enemigonan di Turkia, berdad?”
Un tactica peligroso cu ta pone e Euroturconan entre cashi y muraya di nan patria di origen y esnan cu ta biba eynan, caminda cu nunca nan a haci facil e integracion. “Mi ta dirigi na boso, dirigentenan di AKP (partido Islamista cu ta Goberna na Turkia). E espectaculo cu boso a haci pa haya mas voto ta caba caminda nos lo bay page,” e comentarista Aleman, di origen Turco Emine Arslaner, a skirbi riba Twitterd.
Cu tur cos, dos di e partidonan principal di oposicion Turco, e socialdemocrata CHP y ultranacionalista MHP, a defende su Gobierno y a critica duramente e actuacion di polis Hulandes contra di e manifestantenan di origen Turco cu a congrega na Rotterdam, mescos cu e trato dispensa na e minister Turco di famia, Betül Kaya, na kende a impedi e acceso na e consulado Turco na e ciudad Hulandes aki y cu posteriormente a wordo expulsa for di e pais. Kaya a denuncia cu e agentenan Hulandes “a detene” cinco persona di su ekipo y cu el a wordo wanta na e frontera Aleman-Hulandes pa mas di un ora, durante caminda cu polis a comporta cun’e “di forma bruto y duro.”
E titula di Exterior di Turkia, Mevlut Çavusoglu, e otro minister cu a wordo prohibi na acudi na e acto premira den e consultado Turco di Rotterdam, a denuncia cu e actuacion di Hulanda “ta viola e convencion di Viena” riba e uzonan diplomatico. Esey si, e medida tuma pa Turkia no ta diferencia hopi ya cu el a cera e acceso na e consulado Hulandes di Istambul, e embahada di Ankara y e residencianan di e embahador y e encargado di negoshinan. Ademas, apesar na e importante presencia policial, varios Turco a participa den un manifestacion anti Hulandes, a logra penetra den e edificio consular Hulandes na Istambul, baha e bandera tricolor y hisa esun Turco. Posteriormente, e enseña oficial a wordo reemplasa.
E crisis diplomatico cu Hulanda, nunca mester a sosode ya cu leynan Turco ta prohibi representantenan politico haci propaganda electoral “den exterior y den legacionnan diplomatico Turco den exterior”, segun un ley di 2008, cu e Gobierno di e propio Erdogan a aproba, pero cu poco biaha ta cumpli, apesar cu e Comision Electoral Supremo di Turkia a recorda su vigencia den un decision fecha dia 15 di Februari ultimo.
Ley haci, trampa haci: e campaña di e ministernan a wordo disfrasa di encuentronan cu e comunidad Turco local. E cuestion ta cu pafo di Turkia ta biba 3 miyon di elector cu derecho na participa den e referendum di April y cada voto ta imprescindibel.
E Islamistanan a presenta e incidentenan aki como un conspiracion Europeo en contra di Turkia cu e fin di mobilisa e sentimentonan nacionalista y cu esey aumenta e probabilidad cu e si vence e reforma constitucional den e referendum. No tin cu lubida cu un di e clavenan dilanti e consulta ta cu lo haci e electorado di e partido ultranacionalista MHP, puesto cu si ta bon, ta apoya e reforma, su basenan ta dividi entre duna e bon bista of rechase. Di eynan cu no ta dificil predici cu e Gobierno Turco lo sigui pone tension, mas ainda ora cu e otro parti ta bira facil.
E ultimo ehempel a sosode den e capital Sueco, caminda cu e propietario di un sala di acto caminda cu tabata tin pa interveni un dirigente di AKP, a cancela e contrato na ultimo momento.
Fuente: http://internacional.elpais.com (El Pais)