Recientemente NV Elmar, den cuadro di su responsabilidad social corporativo, a haci un donacion di varios Oscilloscope na studiantenan di EPI Sector Tecnologia. E donacion aki lo percur apa duna e sudiantenan e practica necesario riba ekiponan adecua pa asina yuda e studiante den su desaroyo pa e ta miho prepara pa sector labora y/of estudio mas avansa.
Den combersacion cu vocero y hefe interino di Costumer Relations, Sr. Elton Lampe, a splica cu esaki ta e prome donacion den forma di material, pero den pasado ya caba tin un bon relacion cu EPI, unda cu ta brinda studiantenan cuponan di pasantia, pa asina brinda e oportunidad di siña for di practica y guia nos futuro profesionalnan na e miho manera posibel. Sr. Lampe ta sigur cu e studiantenan lo haci bon uzo di e Oscilloscope cu lo yuda den test coriente di diferente voltahe como tambe observa e cambio di e señal di electricidad.
Sra. Anky Danker, directora “Bedrijfsvoering” a splica di ta sumamente contento di a ricibi sosten den forma di material for di NV Elmar como cu e sector sigur mester cooperacon continuo di sector laboral. Carlos Martinus, Opleidings Manager Sector Ciencia y Tecnologia, tabata encarga cu e contacto cu NV Elmar pa haci esaki posibel y ta contento di e relacion estrecho cu sector Ciencia y Tecnologia tin cu NV Elmar.
A tuma oportunidad di combersa cu un studiante kende a haci su prome pasantia na NV Elmar, Shawn Tromp, ta splica cu e tabata un experiencia grandi di por a traha riba e Proyecto di Smart Meter y wak con e sector laboral a traha como tambe aplica loke el a siña na scol. Shawn ta contento cu e donacion ricibi di NV Elmar y ta mira esaki algo sumamente positivo den e desaroyo pa nan como studiante.
NV Elmar ta spera di por continua cu tipo di donacion asina den futuro cu lo contribui cu formacion di nos futuro profesionalnan den sector di energia y distribucion.