Empresario di Aruba ta haya su propio revista; Entrepreneur Aruba. Esaki a wordo haci posibel den colaboracion cu Camara di Comercio y Industria di Aruba (KvK). E revista local aki ta disponibel den idioma Ingles y ta brinda e empresario (nobo) Arubiano un plataforma yena di informacion valioso, experiencianan remarcabel y diferente conseho cu lo yuda nan negoshi ta ainda mas exitoso.
Entrepreneur Aruba ta ofrece negoshinan na Aruba un plataforma cu un contenido di balor halto den un bachi profesional pa asina duna forma na e economia di Aruba pa e por sigui wordo stimula y di e forma aki tambe atrae y informa inversionistanan.
E revista no tin solamente articulonan encuanto negoshi na Aruba pero e ta elabora tambe riba diferente tema cu tin di haber cu legislacion comercial, impuesto, labor, finansas y ‘corporate governance’ cu ta puntonan di importancia pa e comerciante y for di esakinan e empresario tambe por saca beneficio pa su negoshi.
E revista ta similar na e revista JOB (Jouw Onderneming op Bonaire) cu ta un revista empresarial di Boneiro cu ya caba a crea un nomber pa su mes y a sa di demostra su exito.
No perde e oportunidad aki y haci uso di e iniciativa aki pa por logra cosecha mas exito den bo actual of futuro negoshi. E revista empresarial Entrepreneur Aruba ta gratis y ta disponibel desde 1 di Juli 2017 durante e evento Business Plaza – Get Started! na oficina di Camara di Comercio y Industria di Aruba. KvK lo facilita tur e empresarionan cu ta registra cerca KvK un link via cua nan lo tin acceso na e version digital di e revista. E revista lo wordo publica 1 biaha pa cuartal pues lo ta disponibel cada 3 luna cu un edicion nobo brindando informacion al caso riba diferente topico.
Pa mas informacion por tuma contacto tambe via e-mail: [email protected] of yama nos na: 582-1566, ext. 42/35/27/30.