Na Mei ultimo autor local sr. Richard Frank a publica su prome buki titula ‘Essays on Balance’ y e siman aki sr. Frank a bishita departamento Arubiana pa un entrega oficial di un ehemplar na e Coleccion Nacional y pa conta algo di su buki.
Den ‘Essays on Balance’ e pregunta central ta ‘Pakico mundo ta manera e ta?’ E buki ta consisti di dos parti. Esaki ta un obra, un coleccion di contemplacion den forma narativo cu ta explora y reflexiona riba bida, mundo, e ser humano, naturalesa, energia, tempo, espacio, cambio, universo y e relacion y balance entre tur. Den e di dos parti e autor ta expresa contemplacionnan riba naturalesa di hende en relacion cu su propio ser y tambe como parti di e colectivo, virtud y vicio, religion, politica, boluntad propio, bon y malo y concepto di Dios. Acercando e ideanan cu un punto di bista riba mundo innovativo. E autor ta splica tanto naturalesa como e ser humano den contexto di un laso eterno mara na e leynan universal di balanse. E buki ta skirbi na Ingles. Sr. Frank a entrega e buki na sra. Lourdes Croes, hefe di departamento Arubiana. Pronto lo tin mas ehemplar den circulacion pa miembronan di biblioteca por fia.
Origen di e buki ta den un soño cu e autor a haya tempo cu e tabata un hoben di 14 aña y esaki a haci un impacto grandi riba dje. Asina grandi cu a consecuencia sr. Frank a keda investiga e locual cu el a mira y a scucha den e soño aki y te ainda ta sigui explora loke tin rond y mas aya, loke ta eterno y omnipresente.
Na 1998 sr. Frank a dicidi di pone su pensamentonan riba papel y asina e proceso di skirbi a cuminsa. Y e kico e proceso di skirbi a nifica pa sr. Frank? “E proceso di skirbi a aclarea loke mi ta pensa. Esaki a yudami desaroya e filosofia basico y hinc’e den un forma di naracion, mi ta conta storia y alabes e storianan ta forma e base di e estudio cu mi ta haciendo awor aki”. E autor ta comparti su ideanan y ta pidi e lesador pa tene un ‘open mind’. Segun e autor “e secuencia di e essay nan ta logico y constructivo”. Segun sr. Frank “hende ta nace cu tres capacidad pa tin un of otro nivel di emocion, intuition y e capacidad di rasona. Durante cu bo ta crece bo ta desaroya bo mes di tal manera cu bo ta siña controla e tres forsanan/capacidad y esey ta forma bo identidad y e proyeccion di bo intencion y boluntad. E balansa entre esakinan ta contribui na bo bienestar. Segun Richard Frank “Continuamente bo ta siña y bo por haya e mihor balans. Esey ta un motivacion. Pero un balansa perfecto no ta existi”. “Loke tin semper ta: cambio. Tur cos den bida y mundo ta keda cambia”.
Richard Frank ta admirador di autornan manera John Steinbeck y Hubert Lampo. E mes ta prefera di skirbi na Ingles pero su poemanan ta skirbi na Papiamento. Y e titulo cu e tin pensa pa su coleccion di poesia ta “Loke a conta ayera ta conta awe” pero ainda nan ta den ‘drafts’, kisas algun dia e ta publica su poemanan.
Richard Frank a traha algun luna cu un editor pa corigi y structura e contenido di ‘Essay on Balance’. Esaki riba su mes tabata un proceso cu Richard a siña hopi for di dje. E buki ta dedica na su yiunan.
E publicacion ta un ‘Print on demand’ (POD), esaki kier men cu por scohe cuanto ta laga imprimi. E ta keda entrega den un paar di dia. E buki ta obtenibel caba como Ebook via Amazon.com y pronto den libreria na Aruba.
Richard Frank ta ingeniero y tin 15 aña trahando na WEB. Actualmente e ta elaborando riba su filosofianan, purbando di structura nan poco mas. Cu mucho gusto e ta ricibi feedback constructivo di su lesadornan.