Rebaho di prijs di coriente a keda concretisa pa medio di un documentacion firma entre Prome Minister Eman, Minister di Energia by Utilidad de Meza y director di WEB NV sr. Luis Oduber, sr. Carlos Tapias di Utilities y sra. Gloria Croes di ELMAR NV, ambos ta maneha e parti financiero di nan respectivo compania.
Reduccion di coriente a wordo anuncia algun tempo pasa caba, mescos otro beneficionan pa comunidad, pero awor pa medio di un acuerdo esaki a keda oficialmente formalisa. Entrante 1 di Janauri 2017 coriente ta baha cu 15% pa cas, 5% pa sector comercial y 5% pa instancianan manera entre otro iglesianan. Cu esaki Aruba ta marca pauta un bes mas mirando cu nos prijs di coriente ta awor esun mas barata compara cu prijsnan na Corsou y Boneiro.
Na e ocasion aki Prome Minister Eman a bisa cu pa gobierno e momento ta uno placentero. “Un di e gastonan cu toch ta pisa hopi riba presupuestonan familiar ta e gastonan di coriente cu mester cumpli cu ne mensualmente.” Eman a splica cu gobierno a scoge pa reduci e tarifanan di energia enbes di tuma dividendo di e companianan aki. Un maneho constante desde cu Gabinete Mike Eman a sinta. “Nos ta pone prioridad riba reduccion di tarifanan di energia enbes di crea espacio pa mas entrada pa gobierno. Nos ta haya hopi importante pa nos comunidad por comparti den progreso di pais Aruba. Nos companianan di Utilidad ta birando cada dia mas eficiente dor di haci inversionnan y tambe haciendo uzo di energia alternativa cu ta crea un independencia di e prijs di petroleo.”
Gobierno a wordo informa dor di ELMAR NV cu den su negociasionnan cu WEB NV a yega na tarifanan nobo cu WEB ta cobra ELMAR y esey ta haci cu ELMAR por cobra comunidad un tarifa mas abou. Eman: “Esaki ta locual nos a anticipa algun siman pasa ora nos a informa Parlamento di Aruba cu nos tin miras riba realisacion di un reduccion di prijs di energia cu 15%. Esaki ta bira realidad na inicio di aña 2017.” E documentacionnan cu ta concerni esaki a wordo firma dor di e personanan competente.