Durante conferencia di prensa yama pa Servicio di Impuesto a duna di conoce cu for di dia 6 di December por cuminsa paga number di auto pa aña 2017. E plachi di number di auto lo keda igual, esta e blauw cu blanco, pero e stickernan si lo cambia di color, cual ta color cora, pa esnan cu ta paga pa kwartaal y esun blauw, cu ta paga full aña, segun vocero di Servicio di Impuesto, Meverly Romano.
E ta menciona cu nos ta na comienso di December y lo bay cuminsa cu un aña fiscal nobo. Pa aña 2017, lo bay sigui cu e mesun plachi di number cu tur ta uzando actualmente, esta e plachi blauw cu blanco, manera ya menciona, cu en realidad ta e plachi cu ta uzando desde 2015. Ta keda mantene e uzo di e plachi aki tambe pa e aña fiscal 2017. Pa loke ta trata e stickernan ta continua cu e mesun sistema cu a introduci aña pasa y pa e aña 2017, ta sigui cu e mesun sistema, simplemente e color ta cambia. Pa loke ta e pagonan, ta keda acepta pagonan sea con cliente ta paga den kwartaal of ta paga e belasting pa full e aña. Si e ta scoge pa paga pa kwartaal e lo ricibi su sticker color cora, manera ya menciona y si e cliente ta scoge pa paga su belasting pa full e aña e lo ricibi un sticker blauw.
Pa 2017, tin e dos tipo di stickernan aki cu ta cuadra y esun rondo. E autonan cu ta carga un plachi di number A of un plachi personalisa, ta ricibi un sticker rondo y tur otro auto cu no ta un plachi di number A of no tin un number personalisa, lo ricibi un sticker cuadra.
Tin un cambio pa loke ta e parti di pago pa e number di auto 2017 pa cual e regla ta esun cu no a paga e aña 2015 y 2016 no lo tuma pago di e persona aki mirando cu tin 38% cu no a paga 2016 segun Romano.
E clientenan cu si a cumpli debidamente cu nan belasting den e periodonan anterior ta wordo permiti pa paga 2017, pero si acaso un cliente no a paga 2015 completo of parcialmente y logicamente e no lo a paga 2016 tampoco, e no ta bay wordo permiti pa paga 2017. Riba esey Romano a mustra e cifranan aki cu tin cu bisa cu na nomber di Departamento di Impuesto, no ta contento cu e cifranan. No ta contento cu e resultado cu nan por a wak.
Pa aña 2016, na e momentonan aki, tin 74440 number registra den diferente categorianan. Den e cantidad ey tin un total di 46058 number cu no ta paga completamente. Sea cu e no ta paga pa full e aña of a paga solamente e prome kwartaal of mita aña. Pero en todo caso no a paga e aña completo. Awor aki, manera cu tur hende sa, ta den December caba y tur automobilista mester tin e belasting di full e aña 2016 completamente paga. E 46058 numbernan aki cu no ta paga manera mester ta, ta representa 62%. Esey ta nifica cu unicamente 38% di e automobilistanan a cumpli manera mester ta. Esey tin cu bisa cu e ta un cifra cu ta duna un indicacion dramatico pa motibo cu na e momentonan aki tin asina hopi incumplimento riba caya cu e ta algo cu tin cu bisa e ta un falta di respet pa nos leynan, e ta un falta di respet tambe pa esnan cu si ta percura pa cumpli cu nan belasting. Cu si ta percura pa nan papelnan ta na ordo, pa nan belasting ta paga y posiblemente un gran cantidad di e 46058 aki, tambe kisas no lo tin nan seguro na ordo, Romano a menciona.