Willemstad Curacao: Kontinuando ku un investigashon relashoná ku un kaso di intento di asesinato i destrukshon ku a keda kometé den luna di febrüari 2017, Polis a detené e sospechoso.
Djabièrnè 2 di yüni 2017 alrededor di 10. or di mainta, Polis riba òrdu di fiskal di Ministerio Públiko a detené e sospechoso e hòmber E.S.E. nasé na Kòrsou di 56 aña di edat, relashoná ku e kaso ariba menshoná. Detenshon a tuma lugá na un ofisina riba Sta. Rosa.
Siguiendo ku e investigashon Polis a tene un entrada hudisial na kas di e sospechoso na Grote Berg. Durante di e investigashon na e kas menshoná, e agentenan a haña i konfiská un kantidat di munishon.
A presentá e sospechoso dilanti un fiskal ouksiliar ku a ordená su enkarselamentu pendiente mas investigashon.
E investigashonnan ta kontinuá.