Willemstad: Djárason 10 di mei 2017, alrededor di 03.26 or di mardugá, Sentral di Polis a dirigí un unidat polisial na Janthiel pa un outo ku ta na kandela.
Na yegada di e unidat polisial, nan a konstatá ku tin un outo stashoná di un manera sospechoso ku un hòmber sintá tras di stür ku tabata atendé ku su telefòn. Na e momento ku polis tabata papia ku e hòmber aki, un otro hòmber a yega serka e agentenan i a bisa nan ku tin un outo na kandela den un kurá di kas den bisindario.
Polis mesora a hasi un kòntròl den e outo ku nan tabata pará na dje i a sintí holó stèrki i penetrante di un líkido. Tambe a nota flèknan grandi muhá na e parti abou kaminda e pasahero dilanti ta sinta. E agentenan a nota ku e hòmber aki tabata purba limpia algu for di su mannan. Relashoná ku esaki a detené e hòmber J.L.P. nasé na Kòrsou di 26 aña di edat, komo sospechoso den e kaso di e kandela ariba menshoná.
Brantwer ku a presentá na e sitio no por a evitá ku e outo a kima por kompleto.
A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon. Kontinuando ku e investigashon den e kaso aki, polis a realisá un entrada Hudisial na Kwartje na kas di e sospechoso. Na e kas polis a haña i konfiská dos(2) paki di mariwana i algun dokumento ku ta di importansia pa e investigashon. E investigashon ta kontinuá.