Presidente di sindicato STA, sr, Diego De Cuba ta comparti cu e compania mas vital pa pais Aruba Elmar N.V. pa motibo di suministra coriente pa henter e pais a baha den entrada drasticamente, e compania no ta den problema financiero pero e ta yegando su ‘breakeven point’ pa motibo cu no ta genera locual tabata genera antes, asina sr. De Cuba ta bisa.
Un ehempel cu e ta bisa cu afecta e compania ta e turismo. “Por haci un comparacion di mas o menos 42.000 consumidor y 3000 negoshi manera hotel por bisa cu Elmar su entrada lo ta 30 miyon florin y e 3000 negoshi aki ta duna e compania un 2/3 parti di entrada”, e ta splica.
Un otro punto cu e ta menciona ta e parti di ora e pandemia a cuminsa na Aruba, e permiti e persona pa keda sin paga pa tres luna, pa duna hende espacio pa por paga despues e debe aki, sinembargo ‘hende tin cu cuminsa paga’.
E ta remarca si cu mayoria hende ta pagando pero e cantidad a cay atras y mirando e situacion e ta bisa cu ta un logico. El a menciona tambe pa locual ta trata e trahadornan, ta importante pa sindicato keda sinta cu Elmar.
Actualmente ta bezig cu e contracto colectivo (CAO) pa extende esaki pa un aña pa asina mantene e beneficio di trahado y con ley por yega mirando e crisis actual. Tin e comprension pa tur empleado. Sr. De Cuba ta bisa pa locual ta trata e pensioen cu trahado di Elmar N.V. lo tin ta pa bay over na un futuro mas cercano cu APFA.
E ta bisa cu despues di estudio profundo ta escohe APFA pa ta esun mas beneficioso pa traha. “Tin un comision bezig cu esey y ta mustrando ta bayendo den bon direccion.” Pa 2021, sr De Cuba ta bisa cu lo acerca sindicato cu ta hinca den APFA pa cambia statuut pa asina e representante di e trahado tin mas di bisa pa e fondo aki.
Pa sindicato STA, APFA ta e miho opcion y esun mas stabiel pa trahado di Elmar. Pa finalisa sr. De Cuba a bisa cu mester compronde cu e pandemia aki ta afecta tur hende, por mira con fragil Aruba su economia ta sin turismo y con debil nos ta financieramente.